Թուրքիայի ԱԳՆ-ն հերքել է սիրիացի փախստականների դեպորտի մասին լուրերը

Թուրքիայի ԱԳՆ-ն չորեքշաբթի օրը սիրիացի փախստականների ճամբարում բռնկված անկարգությունների կապացությամբ իր տվյալներն է ներկայացրել և հերքել է Թուրքիայից սիրիացի 600 փախստականներին դեպորտ անելու մասին լուրերը:

«Մենք իրականացնում ենք Աքչաքալայում գտնվող սիրիացի փախստականների ճամբարի հսկողությունը, ուր բնակվում է ավել քան 35 հազար սիրիացի: Մարտի 27-ին շուրջ 200 հոգուց բաղկացած մի խումբ, առանց նախօրոք որևէ բողոք հայտնելու, ըմբոստություն է բարձրացրել և քարեր նետել իրավապահ մարմինների ուժերի ուղղությամբ: Ոստիկանները հարկադրված են եղել միջոցներ գործադրել»,-ասված է Թուրքիայի արտաքին քաղաքական գերատեսչության պաշտոնական կայքում: Այնուհետև նշվում է, որ Թուրքիան փախստականների կարգավիճակի ժամանակավոր ապահովման սկզբունքին համապատասխան՝ չի պատրաստվում երկրից վտարել Սիրիայի քաղաքացիներին և շարունակելու է իր պետության սահմանները բաց պահել նրանց առջև:

ԱԳՆ-ն նշում է նաև, որ այլ սիրիացիներ իրենց դժգոհությունն են հայտնել ճամբարի անդորրը խանգարած խռովարարների դեմ:

Հիշեցնենք, որ նախօրեին ԶԼՄ-ներում լուրեր էին հայտնվել այն մասին, որ թուրքական իշխանությունները սիրիացի փախստականների ճամբարում զանգվածային անկարգություններ հրահրած ավելի քան 600 փախստականների դեպորտ են արել Սիրիա:

Ոստիկանության տվյալներով՝ մարտի 27-ին մի խումբ փախստականներ փորձել են բողոքի ակցիա կազմակերպել ճամբարում վատ բնակելի պայմանների դեմ: Սիրիացիներին խաղաղեցնելու ուղարկված ոստիկանները հարձակման են ենթարկվել նրանց կողմից, ճամբարում ծեծկռտուք է սկսվել:

Միջադեպից հետո իշխանությունները որոշում են կայացրել 600-700 սիրիացիների դեպորտի մասին: