Թուրքիան պատասխանել է Շառլ Ազնավուրին

Թուրքիայի ԱԳՆ-ն պատասխանել է Շվեյցարիայում Հայաստանի դեսպան Շառլ Ազնավուրի կողմից թուրք վարչապետ Ռեջեփ Թայիփ Էրդողանի հասցեին արված հայտարարությանը:

Ինչպես գրում են թուրքական լրատվամիջոցները, Թուրքիայի ԱԳՆ-ի ներկայացուցիչ Լևենթ Գյումրյուքչուն շվեցարական հեռուստաեթերում հնչեցրած Շառլ Ազնավուրի այն խոսքերին, թե Էրդողանն ատում է հայերին և հույներին, պատասխանել է. «Ինձ համար հասկանալի չէ, թե որտեղից է գալիս այդ կարծիքը: Մենք հերքում ենք այդ անհիմն մեղադրանքը: Թուրք ժողովուրդը երկար ժամանակ կողք կողքի ապրել է հայ և հույն ժողովուրդների հետ: Մենք միշտ շեշտում ենք, որ սխալ է պատմության մեջ թշնամանքի պատճառներ փնտրելը»,-հայտարարել է Գյումրյուքչուն և նշել, որ իրենք շատ դրական են գնահատում այն հանգամանքը, որ համաշխարհային մշակույթի գործիչ ու հանրահայտ մտավորական Շառլ Ազնավուրը զարգացնում է հայ-թուրքական հարաբերությունների կարգավորման գաղափարները: «Մենք չենք կիսում նրա որոշ պնդումները, սակայն հավատում ենք, որ համատեղ խաղաղ ապագայի ստեղծումն անցնում է բանակցության ճանապարհով և արդար հիշողությունը վկայակոչելով»,-ասել է նա: