Հալեպում հայ աղջիկների բռնաբարության մասին տեղեկություն չկա

Սիրիայում կառավարական ուժերի և ազատ բանակայինների միջև շուրջ երկու տարի շարունակվող բախումները մոտեցել են քրիստոնյաներով բնակեցված և հայաշատ մի շարք թաղամասերի: Վերջին օրերի ընթացքում բավականին վտանգավոր մարտեր են ծավալվել քրիստոնյաներով բնակեցված թաղամասերի հարևանությամբ գտնվող քրդաբնակ Շեյխ Մախսուդ շրջանում: Այս թաղամասերում բախումներից, առևանգումներից, գողություններից բացի՝ ակտիվորեն շրջանառվում են լուրեր քրիստոնյա աղջիկներին բռնաբարելու մասին: Այս լուրը տագնապ է առաջացրել համացանցի հայ օգտատերերի շրջանում, որոնք անհանգստանում են իրենց հայրենակիցների ճակատագրով: Կրկնակի տագնապ է առաջացրել համացանցում հայտնված անանուն հայտարարությունը, որը հաստատում է այդ բռնաբարությունների փաստը:

«Առաջին լրատվական»-ն այս լուրերի հավաստիությունը փորձեց պարզել Հալեպի Բերիո թեմի ազգային առաջնորդարանի բանբեր Ժիրայր Ռայիսյանի հետ: Նա նշեց, որ իրեն ևս հասել են նման տեղեկություններ: Սակայն նա ցանկացավ ընդգծել, որ պաշտոնապես Հալեպի հայ համայնքում որևէ նման դեպք չի գրանցվել:

«Պաշտոնական որևէ տեղեկանք չկա, որ համայնքի զավակներից մեկը նման դեպքի է ենթարկվել, թեև ես անձնապես տարօրինակ և ոչ էլ անբնական եմ համարում դա: Պատմության մեջ շատ տեղերում թոհուբոհի առիթը մարդիկ օգտագործում են, բայց դեռ չի արձանագրվել նման դեպք: Եթե հայ համայնքի զավակներից որևէ մեկին մի բան լիներ, մենք կիմանայինք այդ մասին: Եթե այդ մասին լուրեր են տարածվում, ապա թող փաստեր ներկայացնեն, որպեսզի մենք հարկ եղած ստուգումներն իրականացնենք»,- նշեց նա:

Հիշեցնենք, որ անանուն հայտարարության մեծ նշված էր. «Աշխարհի ողջ մարդկությանը. ստորև տեղեկացնում ենք՝ լի զայրույթով և կսկիծով, որ, Սիրիայում քրիստոնյա աղջիկների բռնաբարության մասին լուրերը, երեք անգամ Ալլահի անունը տալով (Ալլահը մեծ է), դժբախտաբար, ճիշտ են: Մենք հաստատում ենք լուրերը, սակայն չգիտենք տուժածների իրական թիվը: Մենք չենք ուզում թշնամություն և չենք ուզում նաև, որ մարդկանց սպանեն»: