«Նազենի Հովհաննիսյանի կրքոտ ֆոտոշարքը»՝ լայքեր հավաքելու միջոց

''Արմենիա Թրավել'' տուրիստական գործակալության պատմությունը կարդալիս ծանոթանում ենք՝ ծառայությունների մատուցման բարձր որակի համար ստացած պարգևների, միջազգային կազմակերպությունների անդամ լինելու և այլնի մասին: Սակայն պատկերացումն անմիջապես փոխվում է, երբ հետևում ենք վերջինի ֆեյսբուքյան գովազդային քաղաքականությանը: Այսպես, ֆեյսբուքի գովազդային հատվածներում հայտնվում են ''Նազենի Հովհաննիսյանի կրքոտ ֆոտոշարքը'', ''ՋասԾին Բիբերի հայ մրցակիցը'' և նմանատիպ այլ վերնագրերով գովազդներ:

Գովազդը սեղմելու դեպքում ավտոմատ կերպով հավանում ես կամ հայտնվում ''Արմենիա Թրավել''-ի ֆեյսբուքյան էջում, որը տուրիստական կազմակերպություն է:

Mamul.am-ը զրուցեց ''Արմենիա Թրավել''-ի գլխավոր տնօրեն Հայկ Գրիգորյանի հետ: Վերջինը, որքան էլ զարմանալի է, մեր թղթակցից տեղեկացավ, որ այդպես են իրենք գովազդվում ֆեյսբուքում: ''Ճիշտն ասած՝ ձեզանից տեղեկացա այդ մասին... անկեղծ ասած՝ նոր-նոր ենք սկսել ֆեյսբուքում գովազդ դնելուն ուշադրություն դարձնել... տեսանք՝ գրանցման աճը դանդաղ է, բյուջեից գումար հատկացրինք գովազդի համար... այն անձը, ում հետ համագործակցում ենք, այդ տեսքով է տեղադրել գովազդը... բազմաթիվ կազմակերպություններ կան, որ նման օրինակներ կիրառում են'',- ասաց տնօրենը: Հարցին՝ նորմա՞լ եք համարում ''Նազենի Հովհաննիսյանի կրքոտ ֆոտոշարքի'' միջոցով տուրիստական գործակալության համար լայք հավաքելը, արդարացնո՞ւմ եք Նազենի Հովհաննիսյանի անունը շահարկելը, որի թեման առհասարակ կապ չունի տուրիստական գործակալության հետ, Հայկ Գրիգորյանը պատասխանեց. ''Սոցցանցերում ամեն ինչ չէ, որ արդարացված է, բայց կիրառում են: Չեմ կարող ասել՝ ընդունված է, թե՞ ոչ, արդարացված է, թե՞ ոչ, ես մասնագետ չեմ'':

Զերծ մնալով մեկնաբանություններից՝ նշենք, որ ''Արմենիա Թրավել''-ի՝ հեղինակության հասնելու էպոպեան այսքանով չի ավարտվում. ''Արմենիա Թրավել''-ի պաշտոնական կայքի՝ armeniatravel.am վերևի հատվածում ցուցադրված է ֆեյսբուքի ''Հավանել'' գործիքը, որին կից երևում է, որ կայքը հավանողների թիվը ֆեյսբուքում 228k է (228 հազար), սակայն իրականում ''Արմենիա Թրավել''-ի ֆեյսբուքյան էջն ունի մոտ 7000 հավանում: Հավանումների այդ ֆանտաստիկ թիվն ուղղակի նկար է, որը մատուցվում է հանրությանը որպես իրականություն: Այս մասով էլ, կազմակերպության տնօրենը նշեց, որ ''դա պարզապես նկար է.... դե եթե այդպես եք ասում, կարելի է փոխել, որ թյուրիմացություն չլինի'':

Հետգրության փոխարեն նշենք, որ այս պահի դրությամբ հայկական կայքերից առավելագույն լայքերի թիվը շուրջ 160.000 է: