«Վերադառնում եմ, մոռացեք…» կամ «Ցելոֆանովոյե սչաստիյե»

Վաղը ժամը 13.00–ին Երևանի «Բյուրոկրատ» գրախանութում տեղի կունենա հայ հայտնի դրամատուրգ Կարինե Խոդիկյանի նոր աուդիոգրքի շնորհանդեսը, որը երկու լեզուներով՝ հայերենով ու ռուսերենով նրա հետաքրքիր պիեսի՝ «Վերադառնում եմ, մոռացեք…» ընթերցումն է։ Այդ մասին այսօր լրագրողներին հայտնեց հեղինակը։

Այդ սկավառակը նրանց համար է, ովքեր այս կամ այն պատճառներով չեն հասցնում ընթերցել կամ չեն սիրում։ Պիեսը մի կնոջ մասին է՝ Աննայի, որը անցել է Արցախյան պատերազմի, սև ու մութ տարիների միջով, դա մերօրյա սովորական կինն է, որը ձգտում է երջանկության։ Պիեսը շատ հումորային է. «Ողբերգություն գրելը հեշտ է, դժվար է այդ ողբերգությանը նայել հեգնանքով ու հումորով, ես փորձել եմ ամեն ինչ անել, որ ընթերցողն էլ ետ նայելով իր դժբախտությանը՝ կարողանա ժպտալ ու առաջ շարժվել»,– ասաց հեղինակը։

Նշենք, որ Կարինե Խոդիկյանը սիրված դրամատուրգ է ոչ միայն Հայաստանում։ Մեկ օր առաջ Ռումինիայի «Գլուշ» թատրոնի նրա «Չկրակեք, ես արդեն սպանված եմ» պիեսի բեմականացման պրեմիերան էր։