Հավատում եմ «Բարև Երևան»-ի հաղթանակին. Թևան Պողոսյան

ԱԺ «Ժառանգություն» խմբակցության պատգամավոր Թևան Պողոսյանն իր ֆեյսբուքյան էջում գրել է.

«Իմ խոսքը «Խորհրդարանական շաբաթ»-ի համար

Հարգելի հայրենակիցներ,

Մայիսի 5-ը նոր հանգրվան է Հայաստանի քաղաքական դաշտի իրողությունների համար: «Բարև Երևան» դաշինքը մայրաքաղաքի ավագանու ընտրություններին է գնում Ժառանգություն կուսակցության՝ տարիների ձեռագրին հավատարիմ, գնում է լուսավոր թիմով: Մենք էլի առաջ ենք տանելու նույն արժեքները ու նույն գործելաոճը:

Մենք շարունակելու ենք լավին լավ ասել, վատը մատնացույց անել և օրինական բոլոր միջոցներով պայքարել դրա դեմ:

Առաջ գնալուց իրար բռնած ենք գնալու, ընկնելուց կանգնելու ենք, կանգնելուց ժպտալու ենք:

Թող երբեք կարիքը չլինի, բայց հաջորդ անգամ էլ Արմեն Մարտիրոսյանը հարկ եղած դեպքում վայրկյան անգամ չի մտածելու սեփական մարմնով պաշտպանելու ոստիկանի կյանքը, բայցև նույնքան անվարան կպայքարի, թե համաձայն չլինի կայացված որևէ որոշման հետ:

Տիկին Անահիտ Բախշյանը որտեղ էլ ծառայի իր ժողովրդին, ամենուր տանելու է այն մայրական բարությունն ու հոգատարությունը, հետևողականությունն ու սրտացավությունը, որը մենք միշտ տեսել ենք նրա կողմից քաղաքական բոլոր զարգացումներում: Վստահ եմ՝ ոչ ոք չի կասկածում սրանում:

Ժառանգություն ասելով տարիներ շարունակ մարդիկ առաջին հերթին հասկացել են իրենց իրավունքների համար պայքարող և փոփոխությունների համար կանգնած ազնիվ մարդկանց թիմ: Երևանի ավագանու ընտրություններին էլ «Բարև Երևան» դաշինքը նույն թիմային ոգով է ներկայացել: Մենք խոստանում ենք քաղաքային իշխանություններ, որոնք ճիշտ նույն կերպ կկանգնեն Երևանի և մայրաքաղաքի բոլոր բնակիչների կողքին, կպայքարեն յուրաքանչյուրի իրավունքների համար ու կբերեն թիմային թարմ ոգի: Հավատում եմ, որ ազնիվ ու ամուր մարդիկ շատ բան կարող են փոխել մեր կյանքում և մեր մայրաքաղաքում, հետևաբար հավատում եմ «Բարև Երևանի» հաղթանակին

Շնորհակալություն»: