Թուրքիան ցավով է ընդունում Ցեղասպանության մասին Օբամայի ապրիլի 24-ի հայտարարությունը. Թուրքիայի ԱԳՆ

Թուրքիայի ԱԳՆ-ն հայտարարություն է տարածել նախօրեին ԱՄՆ-ի նախագահ Բարաք Օբամայի կողմից Հայոց Ցեղասպանության 98-րդ տարելիցի կապակցությամբ հղած ցավակցական ուղերձի առնչությամբ: Հիշնգշաբթի օրը Թուրքիայի ԱԳՆ-ի պաշտոնական կայքում տեղ գտած հայտարարությյան մեջ ասված է, որ Բարաք Օբամայի հայտարարությունը Թուրքիայի կողմից մեծ ցավով է ընդունվում և պատմական փաստերի աղավաղում է:

«Օբամայի հայտարարությունն այս հարցի կապակցությամբ, որը երկկողմանիորեն ցավոտ է թե՛ Հայաստանի և թե՛ Թուրքիայի համար,  ընկալվում է որպես հայկական կողմին ցուցաբերած աջակցություն»,-ասված է փաստաթղթում. մեջբերում է Trend-ը: 

Փաստաթղթում նշվում է նաև, որ Վաշինգտոնի կողմից նման հայտարարությունները խոչընդոտում են 1915-ի իրադարձությունները բացահայտելու գործին:

Հիշեցնենք, որ նախօրեին Բարաք Օբաման հանդես էր եկել հայ ժողովրդին ուղղված ամենամյա ապրիլքսանչորսյան ցավակցական ուղերձով, որում 1915-ի դեպքերը որակել էր ոչ թե Ցեղասպանություն, այլ եղեռն բառով և հայտարարել, որ իրենց պարտականությունն է հանդիսանում պահպանել զոհերի հիշատակը և թույլ չտալ պատմության նման մութ էջերի կրկնությունը։