ՅՈՒՆԵՍԿՕ-ի կողմից պահպանվող Հալեպի մզկիթի մինարեթն ավերվել է

Սիրիայի հյուսիսային մայրաքաղաք Հալեպի հինավուրց Օմայան մզկիթի մինարեթն ավերվել է կառավարական զորքերի և ապստամբ գրոհայինների միջև ընթացող մարտական գործողությունների արդյունքում. գրում է Ալ Ջազիրան:

Մզկիթն ընդգրկված էր ՅՈՒՆԵՍԿՕ-ի կողմից պահպանվող մշակութային հուշարձանների ցուցակում: Այն գտնվում էր Հալեպի հին քաղաքում, և մի քանի ամիս շարունակ չեն դադարում կատաղի բախումները կառավարամետ ուժերի և ապստամբների միջև:

Ինչպես հաղորդում են պետական ԶԼՄ-ները, մինարեթի կործանման համար պատասխանատու են ընդդիմության ապստամբ գրոհայինները, որոնք էլ իրենց հերթին մեղադրում են կառավարական զորքերին մզկիթում իրականացրած պայթյունի համար:

Պետական լրավամիջոցների տվյալներով՝ ԱՄՆ-ի կողմից միջազգային ահաբեկչական կազմակերպությունների ցանկում ընդգրկված Ջաբհաթ ան Նուսրա կոչվող խմբավորման գրոհայինները պայթեցրել են մինարեթը:

Ապստամբներն էլ հայտարարում են, որ սիրիական բանակն է կրում դրա ողջ պատասխանատվությունը, քանի որ տանկերը կրակ են արձակել մինարեթի ուղղությամբ, մինչև որ վերջինս ավերվել է: