Ընտրություններով քիչ բան է որոշվում, այլ զոռբայությամբ է որոշվում

Արման Մուշեղյանը Facebook սոցցանցի իր էջում գրել է.

«Չեն կարող բոլորը իշխանություն լինել կամ գոհ լինել իշխանությունից: Չեն կարող բոլորը ծառայեն և սպասարկեն իշխանությանը:

Նույնիսկ փոքրիկ ընտանիքում ոչ բոլորն են միանման մտածում:

Ուստի, որպեսզի լինի հավասարակշռություն և չլինի իրականությունից հեռացում, պետք է լինի այլակարծություն: Եթե մատնացույց ես անում գոյություն ունեցող թերացումները, ապա դու ընդիմադիր ես:

Եթե խոսում ես անօրեն գործողություններից և օրենք խախտելուց, ապա դու ընդիմադիր ես:

Եթե խոսում ես քո իրավունքներից, ապա դու ընդիմադիր ես:

Ընդհանրապես, ցանկացած խոսք, որով դու չես գովերքում գործող իշխանությանը, չես մեծարում նրան, ապա դու ընդիմություն ես:

Իմաստուն և խելամիտ իշխանությունը պետք է շնորհակալ լինի ընդիմությանը, որ բացահայտում է իշխանության թերացումներն և թույլ կողմերը, հնարավորություն տալով իշխանությանը ուղղել այդ սխալները, մեծացնելով վերընտրվելու հնարավորությունը:

Սակայն, քանի որ մեր իրականությունում ընտրություններով քիչ բան է որոշվում, այլ զոռբայությամբ է որոշվում, դրա համար էլ իշխանությունը, փոխարենը հզորանա և ուժեղանա, ուղղակի որպես թշնամի է ընդունում ընդիմությանը և բոլոր միջոցներով փորձում է ոչնչացնել ընդիմությանը:

Իսկ ի՞նչ պետք է անի մարդը կամ մարդկանց միությունը, ում ընդունում են որպես թշնամի և փորձում են ոչնչացնել: Նա ուղղակի պարտավոր է և ստիպված է պաշտպանվել:

Սա էլ տեղի է ունենում մեր իրականությունում և այս լարվածության ու թշնամանքի հիմնական մեղավորը իշխանությունն է:
Վստահ եմ, որ եթե իշխանությունը ինքը չգիտակցի և փոխվի, ապա փոխելու են իշխանությանը, փոխելով խաղի կանոնները և վերացնելով թշնամանքը»: