«Չորրորդ ինքնիշխանություն». ՊՆ փոխնախարարին նկատողություն կտան կամ պաշտոնանկ կանեն

«ՉԻ» տեղեկություններով՝ «բավականին հետաքրքիր զարգացումներ են սպասվում Պաշտպանության նախարարության նիստերում։ Բանն այն է, որ միմյանց դեմ են դուրս եկել պաշտպանության նախարար Սեյրան Օհանյանի առաջին տեղակալը՝ փոխնախարար Դավիթ Տոնոյանն ու փոխնախարար Վլադիմիր Գասպարյանը։ Կոնֆլիկտը ծագել է այն բանից հետո, երբ երկու փոխնախարար իրար հակասող կարծիք են հայտնել իրավապաշտպանների հետ հանդիպման ժամանակ։ Տոնոյանը, որը Պնախարարությունում պատասխանատու է կադրային քաղաքականության, հասարակայնության և տեղեկատվության հետ կապված հարցերի և արտաքին կապերի համար, վերջերս հանդիպել է իրավապաշտպաններին և ասել է, թե ինքը բարձր է գնահատում նրանց պրոֆեսիոնալիզմը, ինչպես նաև կողմնակից է, որպեսզի նախարարությունը պատասխանի այն բոլոր հարցադրումներին, որոնք օրերս հրապարակային հնչեցրել էին իրավապաշտպանները։ Փոխնախարարի այս հանդիպմանը զուգահեռ Վլադիմիր Գասպարյանն է հանդես գալիս հրապարակային հայտարարություններով՝ իրավապաշտպաններին որակելով որպես գրանտակերներ, ազգի դավաճաններ և անհայրենիքներ։

Մեր տեղեկություններով, այսպիսի հարձակողական ագրեսիվ քաղաքականության գիծը Գասպարյանը քննարկել է իր վերադասների հետ, և որոշվել է, որ հենց ինքն էլ պետք է զբաղվի այդ քարոզչությամբ։ Այս ֆոնին Տոնոյանի վարքաբանությունը խիստ զայրույթ է առաջացրել գեներալիտետի մեջ։ Նրանք կտրուկ հրաժարվել են տվյալների բազա տրամադրել Տոնոյանին՝ հայտարարելով, որ իրավապաշտպանները դրսի, օտարածին մարմիններ են, որոնց գործունեությունը բանակի մասով պետք է չեզոքացնել և նրանց մուտքն ընդհանրապես որևէ զորամիավորում և ռազմական կառույց արգելել։ «Եթե ինֆորմացիա տրամադրելն ու թափանցիկություն ապահովելը այս փուլում ինչ–որ մարդիկ առաջադիմություն են համարում, ուրեմն մենք թող ամենահետադիմականի որակումը ստանանք»,ասել են գեներալները փակ հավաքի ժամանակ։ Ի դեպ՝ նրանց հատկապես զայրացրել է այն հանգամանքը, որ փոխնախարար Տոնոյանը այդ հանդիպման ժամանակ հանդուրժել է, որպեսզի ներկա գտնվի նաև Սորոսի հիմնադրամի ներկայացուցիչը։

Պնախարար Սեյրան Օհանյանը արձակուրդից կվերադառնա հոկտեմբերի 27–ին, ասում են, որ արբիտրի դերը հենց նա էլ կստանձնի։ Վերջինս հարցը կքննարկի Սերժ Սարգսյանի հետ, որից հետո նոր որոշում կկայացնի։ Այս պահին խոսակցություններ կան, որ փոխնախարար Դավիթ Տոնոյանին կամ խիստ նկատողություն կտան, կամ կազատեն պաշտոնից»։