«Երկիր». Ամոթ է, էլի՛

«Չնայած բազմաթիվ կոչերին, հորդորներին ու խորհուրդներին , այնուամենայնիվ, Հայաստանի շատ քաղաքացիներ իրենց հանգիստն են կազմակերպում թուրքական ծովափնյա քաղաքներում։

Հայաստանից տարբեր հաշվարկներով մոտ 1,5 տասնայակ հազար մարդիկ իրենց օրվա հացը վաստակում են Թուրքիայում՝ նաև նպաստելով այդ երկրին տնտեսական հզորացմանը։ Հայտնի է, և կարծես, սովորական է դարձել բոլորի համար։ Որ Հայաստանի շուկան ողողված է թուրքական ցածրորակ ու էժանագին ապրանքներով, ապացուցման կարիք չունի։ Բայց որ մեր երկրում թուրքական ընկերությունների բացահայտ քարոզչություն է իրականացվում, դա, արդեն, համաձայնեք, որ անցնում է բոլոր սահմանները։ Հագուստի թուրքական ֆիրմայի այս գովազդը փակցված է առևտրի կենտրոն դարձած «Ռոսիա» կինոթատրոնի հետնամասում։ Գովազդը փակցնողները թույլ են տվել առնվազն երկու կոպիտ խախտում. Հայաստանում պետական լեզուն հայերենն է, ինչը պաստառից հեչ չի զգացվում։ Եվ սրանով պետք է զբաղվի Լեզվի տեսչությունը, այստեղ, սակայն, օրենքից բացի, կա նաև բարոյականության խնդիր։ Ինչ են գովազդում և ինչու։ Նման դեպքերը, ցավոք, քիչ չեն։ Տխրահռչակ հայ–թուրքական արձանագրությունների ի հայտ գալուց անմիջապես հետո, երկու գյումրեցի քույրեր /արմատներով մշեցի/, որոշեցին իրենց անսահման սերն ու նվիրվածությունը Երևանում ի ցույց դնելեղբայրական թուրք ժողովրդին։ Գարեգին Նժդեհի փողոցի խանութներից մեկը թուրքական ապրանքներին նվիրելով, անունն էլ՝ թուրքերենով գրեցին «YEKUZ EV TEKSTIL»։ 2008 թվականից ի վեր ու մինչև վերջերս Հայաստանում գործում է նաև տուրօպերատոր՝ «Թեզ–տուր»–ը։ Իհարկե շատերի համար դա ապրուստի միջոց է։ Երկու երկրների միջև ապրանքաշրջանառություն, այդուհանդերձ կա, Վրաստանի ու Իրանի տարածքով։ Թուրքիայից Հայսատան ապրանքների ներմուծումը մի քանի միլիոն դոլար է կազմում։ Սակայն կան նորմեր, որոնք խախտելը դուրս է բարոյականությունից։ Թուրքերենը հորդում է ոչ միայն խանութներից, այլև հեռուստատեսությունից, բառապաշարից, աղիողորմ «մուղամներից»։ Եվ մինչ Թուրքիայում արգելվում է Հայաստանի ու հայերի հետ բոլորովին կապ չունեցող «Էմպորիո արմանի» ապրանքանիշը, մենք առիթը բաց չենք թողնում նրանց նկատմամբ «բարեկամական» զգացմունքներն ու «հանդուրժողականությունն» ի ցույց դնել»,– հայտնում է «Երկիրը»։