Սիրիայի ապստամբները քիմիական զենք են կիրառել. ՄԱԿ

Սիրիայում մարդու իրավունքների ոտնահարումների հարցերով ՄԱԿ-ի հանձնաժողովի կողմից նշանակված բժիշկ փորձագետների կողմից անցակցված հետաքննության արդյուքնում պարզվել է, որ Սիրիայի զինված ընդդիմությունը թունավոր նյարդապարալիզացնող զարին գազ է օգտագործել: Այս մասին կիրակի օրը RSI (Radiotelevisione svizzera)-ին տված հարցազրույցում հայտարարել է այդ հանձնաժողովի անդամ Կարլա Դել Պոնտեն:

«Ելնելով այն վկայություններից, որոնք մենք հավաքել ենք՝ ապստամբները քիմիական զենք են օգտագործել՝ կիրառելով զարին գազ: Մեր ուսումնասիրությունները հիմնված են տուժածների և բժիշկների վկայությունների վրա: Հանձնաժողովի անդամների կողմից կազմված զեկույցի համաձայն՝ մենք լուրջ կասկածներ ունենք, որ կիրառվել է զարին գազ, սակայն անհերքելի ապացույցներ դեռևս չկան: Ընդ որում, քիմիական զենքն օգտագործվել է ընդդիմության, ոչ թե կառավարական զորքերի կողմից»,-նշել է Պոնտեն, չհստակեցնելով, թե կոնկրետ երբ և որտեղ է կիրառվել քիմիական զենքը: