Հրանտ Բագրատյան. Ճգնաժամից դուրս գալու 10 կետեր

«Ես հիշում եմ 2008-ի մամուլի ասուլիսը, որի ժամանակ կանխատեսումներ արեցի թե ճգնաժամը կտևի 10-15 տարի և ես չսխալվեցի»,– այսօր «Հայելի» մամուլի ակումբում ասաց տնտեսագետ, ՀԱԿ անդամ Հրանտ Բագրատյանը։

Խոսելով ճգնաժամի և դրան հետևող դրսևորումների մասին` Հրանտ Բագրատյանը նշեց, որ այս ճգնաժամային անկայունությունից դուրս գալու համար պետք է կատարվեն մի շարք կարևորագույն քայլեր. «Ես կարող եմ հազար կարևոր կետեր նշել, բայց կխոսեմ տասի մասին, իսկ հերթականության համար պատասխանատու չեմ.  առաջին հիմնական քայլը՝ մենք պետք է ստերիլիզացնենք դրսից եկած օգնությունը, մենք ստանում ենք երկուսից երեք միլիարդ  դոլարի տրանսֆեր, այդ տրանսֆերն արհեստականորեն պահում է կուրսը դրա համար պետք է ստեղծվի կայունացման հիմնադրամ, որի հաշվին պետք է զարգանա և ֆինանսավորվի տնտեսությունը։ Շատ կարևոր է, որ վարկավորման տոկոսն այժմյան 15 տոկոսից իջնի 3-ից 4 տոկոս, իսկ ձեռներեցների թիվը պետք է կազմի 40 տոկոս և դա չի վերաբերում օլիգարխներին»։

 2–րդ կարևոր քայլ՝ երբեք չպետք է թույլ տալ, որ դրամն արժևորվի, այլ հարկավոր է թույլ տալ, որ այն հանգիստ արժեզրկվի, քանի որ ազգային վալյուտայի ցանկացած արժևորում միջազգային պահուստների նկատմամբ հղի է կատաստրոֆիկ հետևանքներով։ 3–րդ՝ պետք է անցնել պրոգրեսիվ վարկավորման համակարգի, 4–րդ՝  բանկերը պետք է հարկեն ինչպես տնտեսության իրական ոլորտը, 5–րդ հանքերը պետք է վաճառվեն, 6–րդ  պետք է կոնսոլիդացնեն ՀՀ  բյուջեն, և վարչապետը չպետք է կարողանա ում ուզի երաշխիք՝ վարկ տա, 7–րդ՝ պետք է բացառել կառավարության որոշմամբ վարկային արտոնություններ տալը, ավելին՝ վարչապետի անմիջական որոշմամբ, 8–րդ՝ պետք է բացառել բանկերում վատ վարկերի դուրս գրումը, ինչը հարկային արտոնություն է, 9–րդ՝ մոնոպոլիաների կարգավորում, 10–րդ՝ պետք է անպայման  իմանանք պետության՝ կենտրոնական բանկի պահուստները որտե՞ղ են, չնայած ես գլխի եմ ընկել, բայց չեմ ասելու, և հետո ինչի՞ ես պետքա գլխի ընկնեի»։