«Հայկական» ընտրակեղծարարությունը հասավ Լոս Անջելե՞ս

Սուրեն Սուրենյանցն իր ֆեյսբուքյան էջում գրել է.

«Մի քանի օր առաջ, «Լոս Անջելես թայմսն» անդրադարձել է Լոս Անջելեսի քաղաքային խորհրդի մայիսի 21-ին նշանակված ընտրություններին՝ գրելով արդեն տեղ գտած ընտրակեղծիքների, սև PR-ի կեղտոտ դրսևորումների մասին:

Մեր ընթերցողների մի մասը կզարմանա, որ ժողովրդավարության խորհրդանիշ համարվող ԱՄՆ-ում էլ է նման բան հնարավոր:

Մյուս մասը տարակուսած կհարցնի՝ ի՞նչ կապ ունի դա մեր հետ: Պարզվում է՝ ունի, այն էլ՝ անմիջականորեն:

Բանն այն է, որ ընտրախախտումների մի զգալի մասն, ըստ թերթի հրապարակումների, կազմակերպվում և տեղի է ունենում մեր հայրենակիցների՝հայերի ձեռքով:

Տեսա՞ք, վերջապես գտնվեց մի ոլորտ, որտեղ մենք արտահանելու բան ունեցանք՝ ընտարակեղծարարությունը:

Ակամայից հիշեցի ընկերներիցս մեկին, որ դեռ 1998թ-ի կեղծված ընտրություններից հետո ասում էր, որ արժի մի ֆիրմա ստեղծել և արտասահմանում զբաղվել այս կամ այն թեկնածուի ընտրությունների կազմակերպմամբ: Ընկերս, ոչ առանց հիմքի, ասում էր, որ կան ընտրակեղծարարության նուրբ, անտեսանելի դրսևորումներ, որոնցից միայն հայերս ենք տեղյակ:

Իսկ ավելի լուրջ՝ հիշեցի Սերժ Սարգսյանի մի հայտարարություն, որն նա արել էր տաս տարի առաջ՝ Ռոբերտ Քոչարյանի նախընտրական շտաբի պետի կարգավիճակում:

Նա մոտավորապես ասել էր, որ մեր մենթալիտետն ու օրինական ընտրությությունների գաղափարն իրար հակոտնյա են: Այն օրերին այդ հայտարարությունը մեծ աղմուկ հանեց:

Փաստորեն, տաս տարի հետո պարզվում է, որ Սարգսյանը չի սխալվել, ավելի ճիշտ կլինի ասել, որ ճիշտ է կանխատեսել իշխանության հետևողական քաղաքականության արդյունքը՝ անցած տարիներին Հայաստանում ձևավորվեց մի խավ, որն իսկապես չի պատկերացնում օրինական ընտրությունների կազմակերպումը:

Այդ խավի շատ ներկայացուցիչներ հիմա ԱՄՆ-ում են, բայց հարազատ են մնացել մեր մենթալիտետային «առանձնահատկությանը» և ԱՄՆ-ի քաղաքական պատմությունը «հարստացնում» են ընտրակեղծարարության նորարարություններով:

Ամերկահայ համայնքն է ափսոս: Մի քանիսի շուստրիության հետևանքով՝ ստվերվելու է հազարավորների անունը»: