Մեր Պատարագը. Օրհնություն և արձակում

Սուրբ Պատարագին գոհություն և շնորհակալություն հայտնելուց հետո՝ (տես՝ «Սուրբ Պատարագ. Գոհաբանություն») պահն է՝ ժողովրդի օրհնության և արձակման: Վարագույրը բացվում է սարկավագի` «Օրհնեա՛, Տեր»-ով:

 Փակման աղոթք

Պատարագիչն ասում է Սուրբ Հովհան Ոսկեբերանի խմբագրած աղոթքներից մեկը. «Որ օրհնես զայնոսիկ, որք օրհնեն զՔեզ, Տէր…»՝ ուղղված առ Աստված: Քահանան Աստծուց խնդրում է Եկեղեցու համար պահպանություն ու օրհնություն, զորություն և խաղաղություն, դպիրները կրկներգում են՝ «Ամեն»: Աղոթքի չորրորդ տան վերջում քահանան ժողովրդին է դառնում, օրհնում խաչով կամ Ավետարանով: Արարողությանը ներկաները պետք է հիշեն իրենց քրիստոնյա եղբայրներին, երկիրը, աշխարհական իշխանություններին ու մարդկությանը: Դպիրները եզրափակում են աղոթքը երիցս երգելով․ «Եղիցի անուն Տեառն օրհնեալ, յայսմհետէ մինչեւ յաւիտեան», այսինքն՝ թող Տիրոջ անունն օրհնյալ լինի այսուհետև մինչև հավիտյան:

Քահանան, վերջացնելով աղոթքը, համբուրելով Սուրբ Սեղանը, սաղավարտը գլխին, Ավետարանը ձեռքին, սարկավագների հետ իջնում է հարավային՝ ձախ կողմով, ինչպես Աշխարհգալոցից հետո բարձրացել էր: Քահանան Քրիստոսի օրինակն է, իսկ Քրիստոսն ինչպես երկինք բարձրացավ, այդպես էլ պիտի վերադառնա:

Պատարագիչն ասում է. «Կատարումն օրինաց եւ մարգարէից, դու ես, Քրիստոս Աստուած Փրկիչ մեր, որ լցեր զամենայն Հայրակամ տնօրէնութիւնս քո. լի՛ց եւ զմեզ Հոգւովդ քով Սրբով»: Նշանակում է՝ «Մեր Փրկիչ Քրիստոս Աստվա՛ծ, Դու ես մարգարեների և օրենքների ամբողջացումը, որ լիովին կատարեցիր Քո հայրական տնօրինությունը, մե՛զ էլ լցրու Քո Սուրբ Հոգով»:

Վերջին Ավետարան

Ժողովրդին արձակելուց և վերջին օրհնությունը տալուց առաջ՝ դարձյալ Ավետարան է ընթերցվում: Ավարտին, դպիրները գոչում են. «Փա՛ռք Քեզ, Տէ՛ր Աստուած մեր», որից հետո սարկավագն անում է իր վերջին հրավերը՝ «Սուրբ խաչիւս աղաչեսցուք զՏէր, զի սովաւ փրկեսցէ զմեզ ի մեղաց եւ կեցուսցէ շնորհիւ ողորմութեան իւրոյ: Ամենակալ Տէր Աստուած մեր կեցո եւ ողորմեա»: Նշանակում է. «Այս Սուրբ խաչով աղաչենք Տիրոջը, որպեսզի սրանով փրկի մեզ մեղքերից և իր ողորմության շնորհիվ մեզ ապրեցնի: Ո՜վ ամենակալ Տեր Աստված մեր՝ ապրեցրո՛ւ և ողորմի՛ր»:

Քահանան Պահպանիչ աղոթքով օրհնում է ժողովրդին։

Արձակման օրհնություն

Դպիրներն ու ժողովուրդը վերջին օրհնությունն են ուղղում Աստծուն. «Օրհնեցից զՏէր յամենայն ժամ, յամենայն ժամ օրհնութիւն նորա ի իմ բերան իմ»: Այսինքն՝ պիտի օրհնեմ Տիրոջը ամեն ժամ, ամեն ժամ նրա օրհնությունը իմ բերանի մեջ է:

Քահանան ասում է. «Օրհնեալ եղերուք ի շնորհաց Սուրբ Հոգւոյն: Երթա՛յք ի խաղաղութիւն, եւ Տէր Յիսուս եղիցի ընդ ձեզ ընդ ամենեսեանդ: Ամէն»: Նշանակում է. «Օրհնյա՛լ եղեք Սուրբ Հոգու շնորհներով: Գնացե՛ք խաղաղությամբ, և Տերը թող բոլորիդ հետ լինի. Ամեն»: Դպիրները շարունակում են երգել սաղմոսի մյուս տները, որի ընթացքում ժողովրդին բաշխվում է մասը: Այն նրանց համար է, ովքեր չեն կարողացել ստանալ Սուրբ Հաղորդություն:

Պատարագիչը ժողովրդին արձակում է Ավետարանով՝ խաչաձև օրհնելով: Նրանք, ովքեր ցանկանում են համբուրել Ավետարանը, մոտենում են, համբուրում՝ ասելով. «Մեղայ Աստծոյ», որին պատարագիչը պատասխանում է. «Աստուած թողութիւն շնորհեսցէ»: 

Քահանայի օրհնությունից ու արձակումից հետո հավատացյալները պետք է գիտակցեն, որ իրենց հետ տանում են Տիրոջ օրհնությունն ու Սուրբ Հոգու շնորհները և ապրեն այդ գիտակցումով: 

Այս թեմայով «Զորակցում ենք Ձեզ». Կենտրոնում երթի ընթացքում մարդիկ մոտենում են Սրբազանին, օրհնություն ստանում (տեսանյութ) Հանրահավաքից հետո ժողովուրդը մոտենում է Բագրատ Սրբազանին, օրհնություն ստանում Բրյուսովի որոշ ուսանողները եռագույնը պատկերող ծուխ են արձակում ու միանում դասադուլին (տեսանյութ) Ինձ համար օրհնություն, պատիվ է լինել Սրբազանի կողքին. բոլորին կոչ եմ անում սթափվել. Արմեն Հյուսնունց (տեսանյութ) Կալանավորվածների ազատ արձակում, Արցախի ժողովրդի հավաքական վերադարձի, անվտանգության ապահովում․Սոցինտերնի խորհրդի բանաձևը Գեղարքունիքի մարզի նորակոչիկները օրհնություն են ստացել Ավերիչ երկրաշարժից 35 տարի անց առաջին անգամ անմեղ զոհերի հիշատակի պատարագը մատուցվեց Գյումրու Սբ Ամենափրկիչ եկեղեցում Հովունիի խոնարհված եկեղեցում վերանորոգումից հետո վաղը կմատուցվի առաջին պատարագը Սուրբ Ծննդյան Ճրագալույցի Պատարագը Սուրբ Գայանե վանքում Հունվարի 5-ին մատուցվելու է Սուրբ Ծննդյան Ճրագալույցի Սուրբ Պատարագը