Քանի՞ երևանցի ձայն կտար Տիգրան Ավինյանին՝ ընտրություններից առաջ թանկացումների մասին «ավետելու» դեպքում
Analytical![Քանի՞ երևանցի ձայն կտար Տիգրան Ավինյանին՝ ընտրություններից առաջ թանկացումների մասին «ավետելու» դեպքում](/timthumb.php?src=disc/29-11-23/fc828f26aaf4e6b6ad50a753ad531719.jpg&w=780)
Երևան քաղաքի ավագանու քննարկմանն է ներկայացվել «Երևան համայնքում տեղական վճարների 2024 թվականի դրույքաչափերը սահմանելու մասին» Երևան քաղաքի ավագանու որոշման նախագիծը, որով առաջարկվում է 2024 թվականի հունվարի 1-ից մայրաքաղաքի կենտրոնում (Երևան քաղաքի «Ա» գոտում) ավտոկայանատեղիում (կարմիր գծեր) կայանելու համար վճարը սահմանել տարեկան 160000 դրամ, իսկ կենտրոնից դուրս՝ (Երևան քաղաքի «Բ» գոտի) 24000 դրամ։ Հիմնավորման մեջ նշվում է նաև, որ նախագիծն ուղղված է Երևանի կենտրոնը բեռնաթափելուն:
2017-ին ընդդիմադիր «Ելք» խմբակցության համար՝ կարմիր գծերի համար նախատեսված տարեկան վճարը 12 հազար դրամի հասցնելն անընդունելի էր: Այն ժամանակ Փաշինյանն ու թիմակիցները վստահ էին, որ դա անուղղակի հարկատեսակ է (քաղաքացին էլ այն ժամանակ դեռ տուգանքի մատերիալ չէր), որն ավելանում է վարորդների համար և պահանջում էին այն չեղարկել: Հիմա, երբ Փաշինյանի թիմակիցները՝ ի դեմս Տիգրան Ավինյանի, մի կերպ վերցրին քաղաքային իշխանությունը, պարզվում է՝ երևանցիների գրպանին խփելու են հենց .․. Երևանի բարօրության համար:
Արի ու տես, որ Ավինյանն ու թիմակիցները որոշել են, որ իրենք այդ ճանապարհով քաղաքի կենտոնն են բեռնաթափելու: Պարզապես ՔՊ-ն իր նախընտրական ծրագրի մեջ մոռացել էր ներառել ճանապարհը, որով պատրաստվում էր իրագործել այդ «դարակազմիկ» գաղափարը: Երևանի ավագանու ընտրությունների արդյունքում ՔՊ-ն, մեղմ ասած, ձախողվեց: Այդ ընտրություններին մասնակցել է ընտրելու իրավունք ունեցողների 28,94 տոկոսը։ Նրանցից 33,81 տոկոսը քվեարկել է ՔՊ-ի օգտին, ինչը կազմում է ընտրություններին մասնակցելու իրավունք ունեցող քաղաքացիների ընդամենը 9,5 տոկոսը։ Հետաքրքիր է՝ եթե իշխանության ներկայացուցիչները նախապես հայտարարեին, որ պատրաստվում են կարմիր գծերի տարեկան վճարը թանկացնել 1300%-ով՝ քանի՞ երևանցի իր ձայնը կտար ՔՊ-ին: Կարելի է ենթադրել, որ այդ 9 տոկոսն էլ հավաքելը Տիգրան Ավինյանի ուժերից վեր կլիներ: Ավելին՝ որքան հիշում ենք, նախընտրական հանդիպումների ընթացքում ՔՊ-ականները խոստանում էին մայրաքաղաքի բեռնաթափման խնդիրը լուծել նոր էստակադաների և մետրոյի նոր կայարանների կառուցման միջոցով: Սակայն, ընտրություններից հետո՝ պարզվում է, որ այդ խնդիրներն էլ փաստորեն լուծելու են երևանցիները` սեփական գրպանի հաշվին: Փաստորեն, ՔՊ-ն և Տիգրան Ավինյանը ոչ ավել, ոչ պակաս պարզապես մոլորեցրել են երևանցիներին և թանկացումների մասին ավետել պոստ-ֆակտում՝ մայրաքաղաքի բնակիչներին կանգնեցնելով փաստի առջև:
![](banners/armflix.jpg)