Շները կարևոր են դարձել մեր երեխաներից․ քահանան ահազանգում է
ԲլոգոսֆերաՏեր Նիքայել Քահանա Նուրիջանյանը սոցցանցի իր էջում գրառում է կատարել, որում, մասնավորապես, նշել է․
«ԽՆԴՐՈՒՄ ԵՆՔ ԿԱՐԴԱԼ ԵՒ ԱՐՁԱԳԱՆՔԵԼ ՀԱՎՈՒՐ ՊԱՏՇԱՃԻ
Մալաթիա-Սեբաստիա վարչական շրջանի պատասխանատուներ, սիրելի բնակիչներ, և հատկապես նրանք, ովքեր բնակվում են Սուրբ Երրորդություն եկեղեցու հարևանությամբ կամ ինչ որ չափով օգտվում են եկեղեցու կանաչապատ տարածքից, մեծ խնդրանք ունենք ամենքիցդ:
ՈՒՇԱԴՐՈՒԹՅՈՒՆ
ՇՆԵՐԸ ԿԱՐԵՒՈՐ ԵՆ ԴԱՐՁԵԼ ՄԵՐ ԵՐԵԽԱՆԵՐԻՑ
Բազմաթիվ խնդրանք- բողոքների պատճառով է, որ այս տողերը գրում եմ: Բոլորս գիտենք, որ եկեղեցու հարակից կանաչապատ տարածքը, ինչքան էլ որ սեփականություն է, այնուամենայնիվ հանրային օգտագործման համար է, սակայն, ինչպես աշխարհի արարման պահից սկսած, այսօր էլ, մարդը, բնությունը պահպանելու փոխարեն, ավելի շատ միտում ունի իր արարքներով ապացուցելով, որ փչացնում և վնասում է այն բնությունը, որի համար բազմաթիվ մարդիկ օր ու գիշեր հոգ են տանում: Եկեղեցու տարածքն էլ դրանցից մեկն է, պետք է խնդրեմ բոլոր նրանց, ովքեր փոքր-ինչ նախանձախնդիր են բնության պահպանման հարցում, օգնեն մեզ՝ պահպանել այդ գեղեցիկ տարածքը, քանի որ, ինչպես գիտեք, այդ տարածքը դարձել է շուն խաղացնելու վայր, փոխանակ մեր երեխաներն այնտեղ խաղան: Հիմա որոշ մարդիկ կփորձեն հակադարձել, թե երեխաներն էլ են խաղում, այո, խաղում են, սակայն այստեղ կա հետևյալ խնդիրը.
1. Շատերը վախ ունեն նույնիսկ ամենափոքրիկ շնից, ինչքան էլ այն անվնաս է:
2. Հիգենիկ չէ նույն տարածքում թողնել որ երեխաներն էլ խաղան, քանի որ շներն այդտեղ նաև կեղտոտում են:
3. Եկեղեցու տարածքն ավելի շատ պետք է հոգևոր մթնոլորտով լցված լինի և ոչ թե շների հաչոցով և այդ տարածքը դարձնելով շների խաղահրապարակ:
4. Կանաչապատման պահպանման հարցն էլ է շատ կարևոր, քանի որ շուն խաղացնողները կոտրում են ծառերից ճյուղեր, հատկապես նորատունկ, և գցում են շների առջև իբրև «խաղալիք», հանում են խողովակների վրա իբրև փական եղած փայտերը և ստացվում է ջրի անիմաստ վատնում:
5. Բազմաթիվ երիտասարդներ և ոչ միայն, զբաղվում են առողջ ապրելակերպով, իսկ շների ներկայությունը, կարծում եմ չի նպաստում դրան:
Այսպես կարող ենք շարունակել, բայց կարծում ենք, որ այսքանն էլ բավական է, որպեսզի կարողանանք սթափեցնել մեր համայնքի սիրելի բնակչիներին, հասկանալու և առավել կարևորելու իրենց երեխաների առողջությունը, շների զբոսանքից, և հոգևոր կյանքով զբաղվելը՝ կենդանիներով զբաղվելուց:
Խնդրում ենք շներին մի բերեք եկեղեցու տարածք, ուրիշ մի տեղ մտածեք այդ կենդանիներին զբոսանքի տանելու համար:
Աստված օրհնի բոլորիդ, որ ընդառաջ պետք է գնաք մեր խնդրանքին»: