Տավուշում երեխաներին ճամբարներ են տեղափոխելու միայն կրակոցների ժամանակ

Տավուշի սահմանին ստեղծված իրավիճակով պայմանավորված` խնդիրների լուծման նպատակով ստեղծվել են մի քանի հանձնախմբեր: Երեկվանից արդեն ակտիվորեն քննարկվում է սահմանամերձ համայնքների երեխաներին  ապահով վայր տեղափոխելու հարցը:

«Հիմա Տավուշում սահմանամերձ գոտու բոլոր երեխաները հաշվառման տակ են, ու համապատասխան աշխատանքեր են կատարվում՝ գնդակոծության ժամանակ նրանց որևէ ապահով վայր տեղափոխել: Մենք աշխատում ենք տարբեր հանձնախմբերով»,-ԼՈՒՐԵՐ.com-ի հետ զրույցում ասաց Տավուշի ԿԳՄՍ վարչության գլխավոր մասնագետ Ռուզան Սաֆարյանը:

Սաֆարյանի խոսքով՝ հարցը քննարկվել է մարզպետարանում, մասնավորապես, թե քանի երեխա կա և  ինչ պատճառներով են նրանք դեռևս գյուղում:

Մասնագետը շեշտում է, որ տարհանում չի կատարվում, պարզապես նրանց անվտանգությունը ապահովվելու է  անհրաժեշտ պահին. «Նախատեսում ենք տեղափոխել կրակոցների ժամանակ՝  նախօրոք պատրաստված ճամբարներ»:

«Բնականաբար, ծնողներ կլինեն, որոնք իրենց երեխաներին մենակ չեն թողնի, ամեն ինչ անում ենք, որ նման դեպքերում նրանց անվտանգությունը ևս ապահովված լինի: Տարածքներ, ապաստարաններ են պատրաստված համապատասխան ձևով: Կան նաև այնպիսի երեխաներ, որոնք, ասենք, ծնողներ չունեն. իրենց անվտանգությունը ևս երաշխավորում ենք»,- ընդգծեց Սաֆարյանը:

Ըստ մասնագետի՝ նախագիծը առաջարկվել է Տավուշի մարզպետարանի համապատասխան ստորաբաժանումների կողմից, իհարկե, մարզպետի գլխավորությամբ:

Աշխատակցից հետաքրքվեցինք՝ արդյոք երեխաներին հոգեբանական աջակցություն անհրաժեշտ չէ, նա ասաց, որ հանձնախումը կքննարկի դա և կտեղեկացնի:

Արփինե Հակոբյան