«Արմավիրի մարզպետը թքած ունի հեղափոխության արժեքների վրա»

Եղեգնուտի բնակիչները այսօր կրկին բողոքի ակցիա էին իրականացնում, սակայն, ի տարբերություն նախորդ ակցիաների, այս անգամ նրանք տեղափոխվել էին Երևան:

Եղեգնուտցիները եկել էին կառավարություն՝ իրենց խնդիրը անձամբ, առանց միջնորդների վարչապետին ներկայացնելու: Ասում են՝ մարզպետին կամ որևէ այլ պաշտոնյայի չեն վստահում, քանի որ նրանք տեղեկատվությունն աղավաղված են վարչապետին հասցնում: Արդեն երկրորդ ամիսն է՝ Եղեգնուտում կրքերը չեն հանդարտվում այն բանից հետո, երբ իմացան, որ դատարանի վճռով համայնքը 30 տարի ղեկավարած նախկին գյուղապետ Ռազմիկ Մարգարյանը ապօրինաբար վերադառնում է պաշտոնին: Նրանք որևէ կերպ չեն համակերպվում այդ դիրքորոշմանը։ Պնդում են՝ գյուղապետ Մարգարյանի օրոք որդնած ջուր են խմել, անբարեկարգ ճանապարհներ ունեցել, գյուղում լուսավորություն չի եղել, ոչ մի ծրագրից չեն օգտվել:

Սակայն, երբ 2018-ին ժողովրդի ճնշման ներքո Ռազմիկ Մարգարյանը հրաժարական է տվել, պաշտոնակատար Ռազմիկ Մկրտչյանը 2 տարվա ընթացքում համայնքում այնքան շատ աշխատանք է կատարել, որ 30 տարվա ընթացքում չի եղել: Ասում են՝ գյուղը լուսավորվել է, ջրամատակարարումը դարձել է 24 ժամ, ճանապարհները՝ բարեկարգվել, մարդկանց մեջ թշնամանքն իրար նկատմամբ՝ վերացել: Ինչպես այսօր կառավարության դիմաց ակցիա իրականացնող եղեգնուտցիներն էին նշում,  չեն հասկանում՝ ինչո՞ւ է մարզպետը պաշտպանում Ռազմիկ Մարգարյանին: 

Եղեգնուտցիները այսօր վարչապետի օգնական Նաիրի Սարգսյանին պահանջ ներկայացրին:

«Վարչապետի օգնական Նաիրի Սարգսյանի հետ ունեցանք  զրույց, որի ժամանակ, մանրամասնորեն, ներկայացրինք մարզպետի կողմից կատարվող  սադրիչ գործողությունները, համայնքի քայքայմանն ուղղված և նախկին համայնքապետի կողմից թալանի  վերաբերյալ էպիզոդներ»,- ԼՈՒՐԵՐ.com-ի հետ զրույցում ասաց «Հանուն ժողովրդի բարեկեցության մարդասիրական և տնտեսական զարգացման» հ/կ նախագահ Այսեր Իսայանը:

Իսայանի պնդմամբ՝ Նաիրի Սարգսյանին համայնքի բնակչության կողմից բարձրացված 3 պահանջ են ներկայացրել. «Համայնքն, առաջին հերթին, պահանջում է  Հանրապետության վարչապետից՝ հեղափոխության թիկունքում գործող և  սադրող մարզպետին, պարզապես, հեռացնել աշխատանքից, այսինքն՝ պահանջում ենք մարզպետի   հրաժարականը: Երկրորդը՝ եթե վարչապետը ժողովրդի պահանջին ընդառաջ չգնա, և թողնի մարզպետին իր տեղում, ապա արգելել  Համբարձում Մաթևոսյանին՝ մարզի համայնքներում սադրիչ  գործողություններ իրականացնելը՝ տղայական մտածելակերպով: Երրորդն էլ, ոստիկանությանն ու իրավապահ մարմիններին համայնքի տարածքում ոչ մի  տեսակի գործողությունների չուղղորդել, որպեսզի չճնշեն և չբռնաճնշեն ժողովրդի իրավունքները»,- ասաց հ/կ նախագահը:

Իսայանը նշում է՝ եթե մարզպետը քայքայիչ գործողություններ չիրականացներ՝ եղեգնուցիները չէին հասնի Երևան:

Նրանից հետաքրքրվեցինք, թե ինչ սադրանքների մասին է խոսքը. «Հրավիրում են համայնքի ղեկավարի գործող տեղակալ Աշոտ Խուրշուդյանին այն պատրվակով, որ նա պետք է ստանա անդորրագրեր: Աշոտը գնում է, որպեսզի ստանա դրանք, բայց մարզպետի հրամանով չեն տրամադրում, և դա քիչ չէ՝ նրան զանգում է Արմավիրի մարզի ոստիկանության վարչության պետի տեղակալ Գալստյանը և հրավիրում իր աշխատասենյակ՝ ինչ-որ հարցի շուրջ զրուցելու, որտեղ և Աշոտին ասում են՝ դու պետք է հանձնես համայնքապետարանի կնիքն ու բանալիները: Հրավիրում են ոստիկանության հետաքննիչին, սեղանին են դնում այդ ընթացքում քննիչի կայացրած որոշումը, Աշոտի գրպանները դատարկել են տալիս, համոզվում են, որ կնիքն ու բանալիները նրա մոտ չեն: Նրանք խախտել են Աշոտի սահմանադրական իրավունքը, այն է՝ չեն բավարարել նրա՝ փաստաբան ներգրավելու պահանջը։ Այսօրվա բողոքի ակցիան հրահրել էր մարզպետը. նա թքած ունի հեղափոխության արժեքների վրա»,- պատմեց Իսայանը:

Եղեգնուտցիները մինչև հինգշաբթի ակնկալում են հստակ պատասխան և շոշափելի արդյունք, այն է՝ մարզպետին աշխատանքից հեռացնելու որոշում կայացնել: Եթե իրենց պահանջը չբավարարվի՝ կրկին բողոքի ակցիա են իրականացնելու, սակայն չեն նշում, թե որտեղ: Ասում են՝ որպեսզի նախօրոք մարդկանց գործողությունները չխոչընդոտեն:

Հիշեցնենք, որ Եղեգնուտի նախկին գյուղապետը՝ Ռազմիկ Մարգարյանը, 2018թ․ իշխանափոխությունից հետո վաղաժամկետ վայր էր դրել իր լիազորությունները գյուղացիների ճնշման տակ, այնուհետև, այդ ժամանակվա մարզպետ Գագիկ Միրիջանյանի որոշմամբ գյուղապետի պաշտոնակատար է նշանակվել Ռազմիկ Մկրտչյանը:

Ռազմիկ Մարգարյանը դիմել է նախ վարչական, ապա վերաքննիչ դատարան՝ պահանջելով անվավեր ճանաչել մարզպետի որոշումն ու իրեն վերադարձնել գյուղապետի լիազորությունները։

Վարչական դատարանը՝ մոտ 1,5 տարի տևած դատաքննությունից հետո, անվավեր է  ճանաչել Արմավիրի նախկին մարզպետ Գագիկ Միրիջանյանի՝ «Եղեգնուտ համայնքի ղեկավարի պաշտոնակատար նշանակելու մասին» թիվ 287 որոշումը:

Արփինե Հակոբյան

Այս թեմայով Հայաստանի լինելիության հարցն է որոշվում. ապագայի շատ կոնկրետ նախագիծ է դրվում սեղանին․ վարչապետ (տեսանյութ) ««Ժողովուրդ, դուք 3 մլն վարչապետ եք», վստահ եմ, չհավատացիք այս խոսքերին, հավատացե՛ք անմահությանը» (տեսանյութ) Մենք հեղափոխություն չենք անում, վարչապետ չենք փոխում, բայց թուրքին մի բերեք մեր տան մեջ. ակցիա Հայ ժողովուրդը կրկին պայքարում է ատելության դեմ. Ուրուգվայի Ներկայացուցիչների պալատի նախագահ Սա է պատերազմից խուսափելու լավագույն միջոցը. Ֆինլանդիայի նախագահ ՀՀ 3-րդ նախագահ Սերժ Սարգսյանը թոռան հետ ծաղիկներ խոնարհեց Ցեղասպանության զոհերի անմար կրակի մոտ Անցյալի ճանաչումն ու անպատժելիության դեմ պայքարը վճռորոշ նշանակություն ունեն նոր ցեղասպանությունները կանխարգելելու համար․ ՀՀ նախագահ Պապուա Նոր Գվինեան արժանի չէ մարդակերության երկիր կոչվելու. վարչապետ Ոչ ոք չի կարող մեզ արգելել կամ ստեղծել այնպիսի պայմաններ, որ Հայաստանի ազգային ակադեմիան գոյություն չունենա․ ՀՀ նախագահ Վարչապետ Փաշինյանն ընդունել է Տոյվո Կլաարին