Նիկոլ Փաշինյանի ելույթը «ֆալշ ստարտ» էր. պետք է հրապարակվի ձայնագրությունը, որ հասկանանք՝ ով որտեղ է ստում
ՔաղաքականՆիկոլ Փաշինյանի ելույթն Ազգային ժողովում նախընտրական քարոզարշավի մեկնարկ էր. «ֆալշ ստարտ»՝ Ազգային ժողովից: Այս մասին ԼՈՒՐԵՐ.com-ի հետ զրույցում ասաց ԱԺ անկախ պատգամավոր Թագուհի Թովմասյանը:
Պատգամավորի խոսքով՝ քննադատությունները, ի վերջո, արդյունք տվեցին, և Նիկոլ Փաշինյանը խոսում է այն մասին, որ Թուրքիան և Ադրբեջանը թշնամի են մեզ:
«Ինչ վերաբերում է հռետորաբանությանը՝ ակնհայտ է, որ մեր այն քննադատությունները, թե դուք լոյալ եք Ադրբեջանի նկատմամբ, ներողամիտ եք, շատ եք խեղճացել Ադրբեջանի դեմ, բնականաբար, լավ է, որ արդյունք տվեց: Արդեն պետական գիտակցում կա, մնում է ՀԿ սեկտորի այն ներկայացուցիչները, որոնք տարիներ շարունակ գրանտներ են ստացել և խաղաղություն են քարոզել, գնացել-մերձեցել են ադրբեջանցիների և թուրքերի հետ, ևս գան այդ համոզմունքին: Մեր մեջքը պետք է ուղղենք, հասկանանք, որ ապրում ենք վտանգավոր տարածաշրջանում և այլընտրանք չունենք, քան զարգանալը և ուժեղանալը»,- ասաց պատգամավորը:
Ըստ Թովմասյանի՝ բոլորը մեղավոր են, բացի երկրի գերագույն գլխավոր հրամանատարից:
«Ինչ վերաբերում է Օնիկ Գասպարյանի հասցեին հնչած հայտարարություններին՝ հասկանում եմ, որ սրանք հեռուն գնացող հայտարարություններ են: Ամեն ինչ արվում է, որպեսզի մեղքը ամբողջությամբ բարդվի բոլորի վրա, բացի գերագույն գլխավոր հրամանատարից»:
«Տեղեկություն չունեմ, թե ինչ է եղել ԱԽ նիստի ժամանակ, բայց մի առիթով Օնիկ Գասպարյանն ինձ ասաց, որ բազմիցս նիստերի ժամանակ ինքը հայտարարել է՝ պետք է ամեն գնով, օր առաջ դադարեցնել պատերազմը, որովհետև հայկական բանակը այլևս չի կարողանում մարտերը վարել և դիմադրել: Թերևս պիտի հրապարակվի ձայնագրությունը, որ հասկանանք՝ ով որտեղ է ստում»,-նշեց Թովմասյանը:
Անդրադառնալով վերջին շրջանի իմքայլական պատգամավորների հայտարարություններին՝ պատգամավորն ասաց, որ դրանք կոնկրետ նախընտրական ելույթներ են:
«Իրենք հասկանում են, որ թրքասիրության քարոզով, համենայն դեպս, Գեղարքունիքի, Սյունիքի ու Վայոց ձորի մարզերում ձայներ հավաքելու խնդիր են ունենալու: Դրա համար փոխել են իրենց հռետորաբանությունը և ինձ համար ամենաանընդունելին այն է, որ քաղաքական գործիչները, պատգամավորները կարողանում են թաշկինակի պես փոխել իրենց տեսակետները»,- եզրափակեց անկախ պատգամավորը:
Արփինե Հակոբյան