«Եթե լինեի քննություն հանձնող, անհարմար կլիներ»․ Դումանյանի դիտողությունը՝ քննակենտրոնում

Հունիսի 8-ին մեկնարկեցին բուհերի ընդունելության միասնական քննությունները: Այդ առթիվ ՀՀ կրթության, գիտության, մշակույթի և սպորտի նախարարի պաշտոնակատար Վահրամ Դումանյանը և նախարարի տեղակալ Կարեն Թռչունյանը այցելել են Երևանի Գ. Ստեփանյանի անվան թիվ 135 հիմնական դպրոցում տեղակայված քննական կենտրոն, որը Երևանում գործող 4 քննական կենտրոններից մեկն է:

Այսօր անցկացվում են «Աշխարհագրություն», «Կենսաբանություն» և «Համաշխարհային պատմություն» առարկաների քննությունները, որոնց մասնակցելու համար հայտագրվել են 1505 դիմորդներ, որոնց թվում «Կենսաբանություն» առարկայի համար՝ 1288, «Աշխարհագրություն» և «Համաշխարհային պատմություն» առարկաների համար՝ համապատասխանաբար 186 և 31 դիմորդ:

Նրանցից 120-ը քննություն են հանձնելու Երևանի Գ. Ստեփանյանի անվան թիվ 135 հիմնական դպրոցի քննական կենտրոնում, սակայն առավոտյան ժամը 9-ի դրությամբ ներկայացել էին 117-ը:

ԿԳՄՍ նախարարի պաշտոնակատարը շրջել է քննական կենտրոնում, հաջողություն մաղթել դիմորդներին:

Շրջայցի ընթացքում Վահրամ Դումանյանը քննական կենտրոնի ղեկավարի և մյուս պատասխանատուների ուշադրությունն է հրավիրել քննությունների սրահներում սեղանների դասավորության վրա` նկատելով, որ դրանց որոշ մասը դրված է ուղիղ արևի ճառագայթների տակ` ապակյա պատի ողջ երկայնքով: Նախարարի դիտողության հիման վրա մինչ քննության մեկնարկը սեղանների տեղաբաշխման փոփոխություն է կատարվել. դրանք շարվել են սրահի այլ, դիմորդների համար ավելի հարմարավետ հատվածներում:

«Ես պատկերացրեցի ինձ քննություն հանձնողի և դիմորդի ծնողի դերում. եթե ես լինեի քննություն հանձնողը, մինչև արևի՝ ստվերում հայտնվելը բավականին անհարմար կլիներ: Դիտողություն եմ արել, և հարցն արագ լուծվել է»,- լրագրողների հետ զրույցում նշել է Վահրամ Դումանյանը:

Անդրադառնալով դիմորդների մասնագիտական նախընտրությունների հարցին` նախարարի պաշտոնակատարը հույս է հայտնել, որ տարեցտարի բնագիտական առարկաների դիմորդները կշատանան: Այդ ուղղությամբ որոշ մասնագիտությունների, օրինակ` ինֆորմատիկա և կիրառական մաթեմատիկա ֆակուլտետի համար մրցակցությունը բավականին թեժ է: Սակայն կարևոր է, որ ԲՏՃՄ ուղղությունն ընդհանուր առմամբ գրավիչ դառնա:

Այս տարի նույնպես հատկացված տեղերի քանակն անհամեմատ ավելի մեծ է, քան դիմորդների թիվը: «Սա նշանակում է, որ բուհերը, հաշվի չառնելով բազմաթիվ իրողություններ, հաճախ չունենալով վերլուծություն, մաքսիմալ հայտեր են ներկայացրել տարբեր մասնագիտությունների համար»,- փաստել է Վահրամ Դումանյանը` շեշտելով կրթական քաղաքականության հիմքում բնագիտական առարկաներն ավելի գրավիչ դարձնելու նպատակադրումը:

«Պետությունը նաև վճարում է որոշակի մասնագիտությունների համար` իր վրա վերցնելով ուսանողի կրթության ապահովումը: Տարիներ շարունակ այս հարցը բարձրացվել է, սակայն հիմնավոր պատասխան առ այսօր չկա. ինչպե՞ս ենք որոշում՝ այս կամ այն մասնագիտության գծով քանի՞ պետպատվերի տեղ է մեզ անհրաժեշտ: Սա լուրջ հետազոտություն պահանջող հարց է: Շատերն են կարծում, թե այդ հետազոտությունը պետք է իրականացնի Կրթության, գիտության, մշակույթի և սպորտի նախարարությունը, բայց դա այդքան էլ այդպես չէ: Սա համընդհանուր մոտեցում պահանջող հետազոտություն է, որտեղ պետք է հաշվի առնվեն պետության հիմնական առաջնային խնդիրները, դիմորդների քանակն ու մասնագիտական պահանջարկը, տնտեսության ներկա վիճակն ու զարգացման միտումները, մասնագիտությունների պահանջվածությունն աշխատաշուկայում և այլն»,- նշել է Վահրամ Դումանյանը:

Նա կարևորել է ընդունելության համակարգում այս տարի կատարված փոփոխությունը, որով առաջնային կարևորություն է տրվում դիմորդների մասնագիտական կողմնորոշմանը: Դիմորդն առաջին փուլում ընտրում է մեկ բուհի մեկ մասնագիտություն:

«Այսինքն` եթե դիմորդը հստակ նպատակ ունի դառնալ, օրինակ, պատմաբան, ապա նա մրցակցության մեջ է մտնում առաջին հերթին բոլոր այն դիմորդների հետ, որոնք նույն նպատակով են քննություն հանձնում: Երկրորդ փուլով, եթե կլինեն թափուր տեղեր, դիմորդը կարող է իր ստացած դրական միավորներով դիմել նաև այլ մասնագիտության համար` չհանձնելով լրացուցիչ քննություն»,- փաստել է ԿԳՄՍ նախարարի պաշտոնակատարը: Նա նաև ավելացրել է, որ ինչպես նախորդ տարիներին, այս տարի ևս թափուր տեղեր անպայման կլինեն, քանի որ հատկացված տեղերն ավելի շատ են, քան դիմորդների թիվը:

Շրջայցի ավարտին Վահրամ Դումանյանը հաջողություն է մաղթել դիմորդներին, ինչպես նաև զրուցել է քննական կենտրոնի մուտքի մոտ հավաքված ծնողների հետ:

Նշենք, որ միասնական քննության տևողությունը 180 րոպե է (3 ժամ): Քննության ավարտից հետո՝ նույն օրը՝ ժամը 13:00-14:00-ին, Գնահատման և թեստավորման կենտրոնը կհրապարակի ճիշտ պատասխանները:

Այս թեմայով Դումանյանը հրաժեշտի ուղերձ է հրապարակել ԿԳՄՍ նախարար Վահրամ Դումանյանը հանդիպել է բուհերի ռեկտորների հետ Չարժի ստեղ քննարկենք․ Դումանյանը՝ զինվորների՝ տեղանքում կողմնորոշվել չկարողանալու մասին Նիկոլ Փաշինյանը ինձ նկատողություն չի արել․ Դումանյանը ապատեղեկատվություն համարեց այդ լուրը Վահրամ Դումանյանը նամակ է հղել ՅՈՒՆԵՍԿՕ-ի գլխավոր տնօրեն Օդրի Ազուլեին՝ կցելով ՄԻՊ-ի հատուկ զեկույցը ԵՊՀ շենքը մնալու է ԵՊՀ շենք․ Դումանյան Ռոլիկ են նկարել, հրապարակել են, դա ինձ չի հետաքրքրում․ Դումանյանը՝ Հիսուսի արձանի մակետի մասին Վահրամ Դումանյանը մեկնաբանեց կնոջ ընդդիմադիր գրառումները սոցցանցում Ով ինչ ուզում, խոսում է․․․ Դումանյանը բացեց թղթերն ու կարդաց՝ քանի ընդունվող ենք ունեցել 2022-ին «Հետքին» հարցրեք, ես՝ չգիտեմ»․ Դումանյանը՝ Հատիսի հողատարածը Գագիկ Ծառուկյանին օտարելու մասին