ՔՊ-ական թաղապետերի խախտումները. ովքե՞ր են լծվել Փաշինյանի համար ձայն ապահովելուն

Վերլուծական 17 Հունիս, 2021 21:11

ՔՊ-ական պաշտոնյաներից մարզպետների և նախարարների ձայն հավաքելու ջանասիրությանը ոչնչով չեն զիջում Փաշինյանի թիմակից, վարչական շրջանների ղեկավարները: Վերջիններս, ստանալով ավելի բարձր աշխատավարձ, քան նույնիսկ ԱԺ պատգամավորները, լծված են ոչ թե սեփական աշխատանքի հաշվետվությունները հանրությանը ներկայացնելով, այլ քարոզարշավին` այն էլ առանց արձակուրդ ձևակերպելով, ասելու է թե՝ աշխատանքային ժամերի հաշվին:

Մայիսի 28-ին, ՀՀ վարչապետի պաշտոնակատար Նիկոլ Փաշինյանը այցելել է «Քաղաքացիական պայմանագիր» կուսակցության երևանյան գրասենյակներ և հանդիպել կուսակցության համակիրների հետ: Մամուլում տեղեկություններ էին տարածվել, որ քաղաքացիներին զանգել և կանչել են գրասենյակներ, որպեսզի տպավորություն լինի, որ Փաշինյանի հետ հանդիպմանը մեծ թվով համակիրներ են հավաքվել:

Տեսանյութում քաղաքացին նշում է, որ իրեն զանգահարել և հանդիպման է կանչել թաղապետը, ինչը վարչական ռեսուրսի կիրառում է: «Առավոտ, ի պատիվ մեր թաղապետի, զանգել է տուն, ասել է` արի, որ պարոն Փաշինյանը գալու է, արի, որ հանդիպես, երկու բառ էլ ասես»,- Փաշինյանի հետ զրույցում նշել է հանդիպմանը եկած քաղաքացիներից մեկը: Խոսքը Դավթաշենի թաղապետ Միքայել Թումասյանի մասին է, ով նաև պատգամավորի թեկնածու է:

Շենգավիթ վարչական շրջանի ղեկավար Ռազմիկ Մկրտչյանը իր ֆեյսբուքյան էջում ուղղակիորեն ուղղորդում է ընտրողներին, ինչը նույնպես օրենքի խախտում է:

Մալաթիա Սեբաստիա վարչական շրջանի ղեկավար Դավիթ Կարապետյանի ֆեսյբուքյան էջում իր կատարած աշխատանքի հաշվետվության և վարչական շրջանին վերաբերվող նորությունների փոխարեն՝ Նիկոլ Փաշինյանի նախընտրական ելույթներն են և ընտրողներին ուղղորդելու հակաօրինական փորձերը՝ պետական պաշտոնյայի կողմից:

Ավանի տխրահռչակ փոխթաղապետ Ներսես Պողոսյանը իր անձնական էջում սպառնալիքներ և հայհոյանքներ է տեղում ընդդիմադիր գործիչների և ակտիվիստների հասցեին: Վերջինս, օրինակ, սպառնում էր հաշվեհարդար տեսնել Փաշինյանի նախընտրական պաստառը գունազարդողի հետ: Իրավապահ մարմինները, իհարկե, անուշադրության են մատնել տվյալ բացահայտ հակաօրինական պահվածքը, որը դրսևորել և դրսևորում է սույն պաշտոնյան:

Ինչպես տեսնում ենք՝ ՔՊ-ական պաշտոնյաները առանց նույնիսկ արձակուրդ ձևակերպելու ուղղակի կամ անուղղակի զբաղված են նախընտրական քարոզչությամբ, ներգրավված են այդ գործընթացում, դեռ մի բան էլ շարունակում են անպատիժ օրենք խախտելը...