Փաշինյանը հակասում և հերքում է ինքն իրեն. ի՞նչ էր ասում վարչապետը ամիսներ առաջ

Վերլուծական 25 Հունվար, 2022 17:00

Վարչապետ Նիկոլ Փաշինյանի առցանց ասուլիսը թեև բովանդակային առումով նախորդների համեմատ նոր շեշտադրումներ չէր պարունակում, այնուամենայնիվ, այս հարցազրույցի ընթացքում էլ կարմիր թելի պես անցնում էին հակասությունները հենց իր` տարիներ կամ ամիսներ առաջ հայտարարությունների հետ։

Դիցուք` հեղափոխությունից հետո համազգային օրակարգերի շուրջ համախմբման կոչ անող Փաշինյանը առիթը բաց չէր թողնում հայտարարելու, որ Հայ Դատի օրակարգը առաջ մղելը կառավարության առաջնահերթություններից է։ Այսօր պարզվում է Հայ Դատը մշտապես եղել է բացառապես Սփյուռքի օրակարգը, իսկ Հայաստանի իշխանությունները այդ օրակարգի հետ որևէ առնչություն չեն ունեցել և չունեն։ Պարզից էլ պարզ է, որ նմանատիպ հայտարարություններով Փաշինյանը փորձում է սկիզբ դնել հայ-թուրքական հաշտեցման գործընթացին, որի թուրքական կողմից հնչեցված նախապայմաններից մեկը հենց Հայոց Ցեղասպանության միջազգային ճանաչման գործընթացից հրաժարվելն է։

Ի դեպ` նախապայմանների մասին։ Երեկ Փաշինյանը հայտարարեց, որ չի բացառում թուրքական կողմից նախապայմաններ առաջ քաշվեն։ Սա ասում է այն նույն Փաշինյանը, ով շաբաթներ առաջ թուրքական կողմից ստացված դրական ազդակների մասին էր հայտարարում։ Հետաքրքիր է՝ իսկ ե՞րբ Փաշինյանը հասկացավ, որ այդ նախապայմանները կարող են առաջ քաշվել` արդյոք՞ բանագնացների հանդիպման արդյունքներում է նրա մոտ այդպիսի մտավախություն ի հայտ եկել, թե նա, ի վերջո, ծանոթացել է թուրքական պաշտոնյաների հանրային հայտարարություններին։

Փաշինյանը նաև չբացառեց, որ թուրքական ապրանքների հոսքը մեր երկիր կարող է էապես հարվածել հայկական գյուղատնտեսությանը։ Մինչդեռ թուրքական ապրանքների ներմուծման արգելքը հանելուց թե Փաշինյանը, թե պատկան մյուս կառույցները համոզում էին գյուղատնտեսներին, որ նման ռիսկը գրեթե զրոյական է և որ ամեն բան հաշվարկված է հայրենի արտադրողին պաշտպանելու նպատակով։

Փաշինյանը ով հեղափոխությունից հետո ամբիոնից հայտարարում էր, որ Արցախը Հայաստան է և վերջ, այժմ խոստովանում է, որ սկսած 2018 թվականից հասկացել էր, որ Արցախը Ադրբեջանի կազմում չգտնվելու տեսական և գործնական հնարավորություն փաստացի չունի։

2018-ին խոստանալով անփոփոխ պահել ջրի սակագինը` 2021-ին Փաշինյանը այն, այնուամենայնիվ, բարձրացրեց, այժմ էլ հանդես է գալիս նմանատիպ մեկ այլ խոստումով, հայտարարելով, որ մոտակա տասը տարիների ընթացքում ջրի սակագինը չի փոխվի։

Ամիսներ առաջ Փաշինյանը հայտարարում էր, որ մենաշնորհների դեմ պայքարում դեռևս որոշակի բացեր և թերություններ կան։ Երեկ վարչապետը պնդում էր, որ ՀՀ իշխանությունները ամբողջությամբ վերացրել են մենաշնորհը։

Վերը նշվածները ընդամենը մի քանի օրինակներ են այն հակասական հայտարարությունների, որոնք իր երեկվա ասուլիսի ընթացքում հնչեցրել է Փաշինյանը։ Մի բան ակնհայտ է, ՀՀ բարձրագույն ղեկավարության մոտ այդպես էլ չվերացավ պոպուլիզմը, արդյունքում ինքնահակասական մտքերի պակաս հանրային տիրույթում չի զգացվում...: