«Դժվար ապրուստ» հեռուստասերիալի դերասանուհի Մարիաննա Մխիթարյանը չգիտեր սերիալի՝ «աղբ եթերից» մրցանակին արժանանալու մասին»

«Չենք լռելու» երիտասարդական նախաձեռնության որոշմամբ «Աղբ եթերից» մրցանակաբաշխության երրորդ հաղթող է ճանաչվել «Արմենիա» հեռուստատեսությամբ ցուցադրվող «Դժվար ապրուստ» հեռուստասերիալը՝ ամենօրյա եթերային լացուկոցի և կանանց հանդեպ որպես սովորական երևույթ ներկայացվող բռնության տեսարանների համար:

Փոստի միջոցով «Դժվար ապրուստ» հեռուստասերիալի ստեղծագործական խմբին է ուղարկվել հաղթանակի մասին հավաստագիր, իսկ «Արմենիա» հեռուստաընկերությանը փակ ծրարով առաքվել է 100 դրամ՝ աղբահանության գումար: Թեմայի վերաբերյալ ԼՈՒՐԵՐ.com-ի թղթակիցը զրուցեց «Դժվար ապրուստ» սերիալի դերասանուհիներից Մարիաննա Մխիթարյանի հետ։ Զարմացած դերասանուհին ասաց. «Ճիշտն ասած ես նոր լսեցի «Աղբ եթերից» և մրցանակաբաշխության և թե «Դժվար ապրուստ» սերիալի՝ մրցանակին արժանանալու մասին` ես դա չգիտեի, դրա համար հարցի վերաբերյալ որևէ մեկնաբանություն անել չեմ կարող»։

Հիշեցնենք, որ «Աղբ եթերից»-ի առաջին մրցանակակիրը Հանրային հեռուստատեսությամբ հեռարձակվող «Աննա» հեռուստասերիալն էր՝ սյուժեն տարիներով արհեստականորեն ձգձգելու և հեռուստադիտողի ճաշակի վրա ակնհայտ բացասական ազդեցություն ունենալու համար:

Երկրորդ հաղթողը «Շանթ»-ի «Բանակում» սերիալն էր՝ զինված ուժերում առկա ոչ կանոնադրական հարաբերությունները փայլուն և հումորային փաթեթավորումով որպես նորմա ներկայացնելու համար։