Գուրգեն Արսենյան. Քաղաքային իշխանությունները քաղաքապետով չեն սահմանափակվում

Օրեր առաջ տեղի ունեցած մամլո ասուլիսի ժամանակ ՄԱԿ կուսակցության նախագահ Գուրգեն Արսենյանը հայտարարեց, որ իրեն պատիվ չի բերում քաղաքային այս իշխանությունների հետ աշխատելը և իրեն պատկանող «Յունիքոլ գրուպ» գովազդային ընկերությունը,  դադարեցնում է գործունեությունը։

Այս հայտարարության համար պատճառ էր հանդիսացել այն, որ քաղաքապետի կարգադրությամբ Մաշտոցի ու Սայաթ–Նովայի փողոցների «Յունիքոլ գրուպ» և «Նուշիկյան ասոցիացիա» գովազդային ընկերությունների գովազդային վահանակները հանվել էին. այդ ընկերություններին հասցվել էր 150 և 170 հազար ԱՄՆ դոլարի վնաս։ Այս հարցով ընկերությունները դիմել են դատարան՝ պահաջելով վնասի փոխհատուցում։

Հարցի առնչությամբ գործարարի հետագա քայլերի մասին տեղեկանալու համար ԼՈՒՐԵՐ.com լրատվականի լրագրողը կապ հաստատեց Գուրգեն Արսենյանի հետ։

«Մենք մեր ընկերությունը փակել ենք քաղաքային իշխանությունների հետ հակասություններ ունենալու համար և այսօր էլ դա կարող եմ կրկնել»,– ասաց պարոն Արսենյանը։

ԼՈՒՐԵՐ.com–ի լրագրողի հարցին, թե այժմ, երբ Կարեն Կարապետյանն այլևս քաղաքապետ չէ, արդյոք պարոն Արսենյանը չի՞ ուզում վերականգնել ընկերության գործունեությունը, արդյոք քաղաքային իշխանություն ասելով՝ նա հենց Կարապետյանին նկատի չունե՞ր, գործարարը պատասխանեց. «Այո, հեռացավ քաղաքապետը, բայց քաղաքային իշխանությունները միայն նրանով չեն սահմանափակվում։ Այդ գործին մասնակցել է քաղաքապետարանի իրավաբանական բաժինը, գովազդային բաժինը»։

«Մեր ընկերության գործունեության վերսկսումը կախված է նախ և առաջ դատարանի որոշումից, եթե դատական ատյանները որոշեն, որ մենք օրենք ենք խախտել, ապա մեր քայլերն այլ կլինեն։ Սպասենք դատարանի որոշմանը»,– հավելեց նա։