«Դվին» հյուրանոցը կվերակառուցվի Կիպրոսում գրանցված ընկերության կողմից. կկրի Դավիթ Բեկ անվանումը

Այսօր կառավարությունը հավանոություն տվեց «Դվին» հյուրանոցային համալիր վերակառուցման ներդրումային ծրագրին:

Նախատեսվում է, որ վերակառուցումից հետո այն լինելու է Երևան քաղաքի ամենաշքեղ հինգաստղանի հյուրանոցը: Հյուրանոցի հիմնական մրցակցային առավելությունը կայանալու է նրա կենտրոնական տեղակայվածության, մեծ հողային մակերեսի (1,814 հա.), մյուս հյուրանոցների համեմատությամբ ստանդարտ սենյակների ընդհանուր մակերեսի շատ ավելի մեծ չափի, ինչպես նաև ժամանակակից և բացառիկ հյուրանոցային ենթակառուցվածքի մեջ: Բացի այդ, հյուրանոցային համալիրը ներառելու է բարձրակարգ ռեստորաններ, ակումբներ, խանութներ, բիզնես կենտրոն և կոնֆերանս կենտրոն, ՍՊԱ սրահ, լողավազան, Ֆիթնես կենտրոն, հանդիսությունների դահլիճներ և այլն: Ինչպես նաև հյուրանոցի տարածքում նախատեսվում է բարձրակարգ (VIP) խաղատան կազմակերպում՝ համապատասխան լիցենզիայի հիման վրա:

ԼՈւՐԵՐ.com-ի տեղեկացմամբ՝ «Դվին» հյուրանոցային համալիրի վերակառուցման ծրագրի ներդրողն է հանդիսանում Սի-Սի-Ջի Կովկասյան Կոմունիկացիոն Խումբ Ընկերությունը (CCG Caucasian Communication Group Limited), իրավաբանական անձ՝ գրանցված Կիպրոսի Հանրապետության օրենսդրության համապատասխան:
Սի-Սի-Ջի Կովկասյան Կոմունիկացիոն Խումբ Ընկերությունը հանդիսանում է «Դվին» հյուրանոցային համալիր փակ բաժնետիրական ընկերության 100% բաժնետոմսերի սեփականատերը:

Նշենք նաև, որ հյուրանոցային համալիրը ներառելու է նաև «Բնակելի բազմաֆունկցիոնալ համալիր» («Apartments Plaza»), որի վերևի հարկում նախատեսվում է ունենալ հարթակ ուղղաթիռի համար:

Նախատեսվում է հյուրանոցային համալիրի ռեբրենդինգ և նրա վերանվանում՝ Դավիթ Բեկ Հյուրանոցի: