Qatar Airways-ը շաբաթական 4 չվերթ կիրականացնի՝ Հայաստանը կապելով ամբողջ աշխարհի հետ

Qatar Airways-ի գլխավոր կոմերցիոն տնօրեն Հըուհ Դանլիվինն այսօր լրագրողների հետ հանդիպման ժամանակ հայտարարեց, որ շաբաթվա ընթացքում 4 թռիչք են իրականացնելու Դոհա-Երևան-Դոհա։ Այդպիսով՝ Հայաստանը կապելով աշխարհի 154 քաղաքների հետ։ Դեպի Երևան չվերթն իրականացվելու է A320 օդանավով՝ տրամադրելով 12 նստատեղ՝ բիզնես և 132 նստատեղ՝ էկոնոմ կարգ։  

«Մենք Դոհայի միջոցով Երևանը կարող ենք կապել ԱՄՆ-ի, Ավստրալիայի և Եվրոպայի հետ։ Շարունակաբար զարգացնելու ենք մեր չվերթները։ Օդանավը հնարավորություն կընձեռի նաև մինչև 48 տոննա բեռնափոխադրում իրականացնել Երևանից Դոհա»,- մանրամասնեց տնօրենը։ Երևան-Դոհա թռիչքի տևողությունը 3 ժամ է: 

Ընկերության գնային քաղաքականությունը կլինի մրցունակ, վստահեցնում է տնօրենը։ Ըստ այդմ՝ մեկ թռիչքի ժամանակ կարող է առաջարկվել տոմսերի գների 30 տարբերակ, ինչը խոսում է ընկերության գնային ճկուն քաղաքականության մասին։ 

Ասուլիսին ներկա՝ «Զվարթնոց միջազգային օդանավակայաններ» ՓԲԸ գլխավոր մենեջեր Մարսելո Վենդեն իր հերթին կարևորեց այս ավիաընկերության մուտքը Հայաստան։ Վենդենը վստահեցրեց, որ «Զվարթնոցը» պատրաստ է ընդունել այս ավիաընկերությանը, որը, տնօրենի խոսքով, բաց երկնքի քաղաքականության հերթական դրական ձեռքբերումն է։ Դա հնարավորություն կտա Հայաստանը կապել ամբողջ աշխարհի հետ։ Այն կզարգացնի նաև տուրիզմը։ 

Հավելենք, որ այսօր տեղի է ունեցել քաթարական Qatar Airways ավիաընկերության առաջին չվերթը դեպի Երևան: Qatar Airways-ը Քաթարի Պետության պետական դրոշակակիր ավիաընկերություն է, որը սպասարկում է վեց աշխարհամասերը՝ չվերթներ իրականացնելով վերջին սերնդի օդանավերով Դոհայի «Համադ» միջազգային օդանավակայանից, ավելի քան 150 ուղղություններով: