Կա՞, թե՞ չկա ապօրինի մենաշնորհ. Արմեն Ալավերդյանը խուսափեց վարչապետին մեկնաբանելուց

Կարծում եմ՝ ծառայողական ավտոմեքնաների կրճատումը նպատակահարմար է և այդ ավելորդ ավտոմեքենաներից ազատվելը նաև որոշակի ծախսերի տնտեսում կարող է լինել: Ուղղակի պետք է որոշել՝ պետական որ պաշտոնյաները կարող են օգտվել ծառայողական ավտոմեքենաներից, իսկ ովքեր չեն կարող: Այս մասին Ազգային ժողովում լրագրողների հետ զրույցում ասաց ՀՀ ԿԱ ՊԵԿ նախագահի 1-ին տեղակալ Արմեն Ալավերդյանը:

ԼՈւՐԵՐ.com-ի տեղեկացմամբ՝ Ալավերդյանից լրագրողները հետաքրքրվեցին, թե ինչո՞ւ հիմա միայն սկսվեց նման կրճատումները, արդյոք նախկինում մեր երկրի սոցիալ-տնտեսական վիճակն ավելի լա՞վ էր.

«Ես ակնկալում էի՝ ինձ եկամուտներից հարցեր կտայիք, բայց ասեմ, որ միշտ էլ մեր երկրում գործուղումների, ծառայողական մեքենաների թեման միշտ էլ բարձրացվել է և կարելի է 2016 թվականին այդ ճանապարհով գնալ և գնալ որոշակի տնտեսումների: Դա իմ անձնական կարծիքն է»,- ասաց Ալավերդյանը:

Հարցին, թե ինքն ապօրինի մենաշնորհի առկայություն Հայաստանում տեսնո՞ւմ է, քանի որ այդ մասին օրերս վարչապետն իր հայտարարությունում է ասել, պատասխանեց. «Ես, ճիշտն ասած, մենաշնորհ հասկանում եմ՝ ապօրինի մենաշնորհը չմեկնաբանեմ և ինչո՞ւ եք դա անպայման կապում պարոն Աբրահամյանի հետ: Ես ավելին ասեմ՝ ես կարդացել եմ ու ծանոթ եմ կառավարության գործունեության ծրագրին, որտեղ հստակ այդ մասին նշվում է, ուղղակի կարծում եմ՝ մենաշնորհի մասին կարող է խոսք լինել»:

Ճշտող հարցին, թե արդյոք իրենց գերատեսչությո՞ւնն է վարչապետին տվել նման տեղեկատվություն, թե մեր երկրում ապօրինի մենաշնորհ կա, Ալավերդյանն ասաց. «Կառավարությունը տեղեկատվական մեծ  հոսքեր է տիրապետում և պետական տարբեր մարմիններ կարող են տեղեկատվություն տրամադրել: Հանրապետության վարչապետը մի աղբյուրից չի օգտվում, նա օգտվում է տեղեկատվական բազմազան աղբյուրներից»:

Հարցին, թե արդյոք ինքն իր աշխատանքային երկարատև տարիների ընթացքում տեսե՞լ է ապօրևինի մենաշնորհ, կրկնեց, որ ինքը մենաշնորհի մասին կարող է խոսել, իսկ Հովիկ Աբրահամյանի առաջ քաշած ապօրինի մենաշնորհը չի հասկանում: