Շաքարավազի շուկայում ապօրինություն չկա. Արմեն Ալավերդյան

Հայաստանում ապօրինի մենաշնորհ կա՞, թե՞ ոչ: Այս հարցին այսօր շաքարավազի շուկայի օրինակի վրա Ազգային ժողովում պատասխանեց ՊԵԿ առաջին տեղակալ Արմեն Ալավերդյանը:

ԼՈւՐԵՐ.com-ի տեղեկացմամբ՝ նա նշեց, որ արտադրական նպատակներով օգտագործվող շաքարավազը ներմուծվում է տասնյակ կազմակերպությունների կողմից:

Հարցին, թե այդ տասնյակ կազմակերպությունները նույն մարդու անունով են գրանցված, Ալավերդյանը հակադարձեց՝ պնդելով, որ քաղցրավենիքի արտադրությամբ զբաղվող կազմակերպություններն իրենք են ներմուծում շաքարավազը, ոչ թե ձեռք բերում կոնկրետ կազմակերպությունից:

«Ինչ վերաբերում է մանրածախ վաճառքին՝ այո, ավելի շատ քանակությամբ ներմուծող կազմակերպություն կա, և ինձ՝ որպես ՊԵԿ-ի ներկայացուցիչ, հետաքրքրում է նրա կողմից վճարված հարկերի մեծությունը, իսկ որ դա համարենք մենաշնորհ, թե ոչ, դրա համար պետական համապատասխան մարմին կա, հանձնաժողով կա, որը պետք է ձեր որակումներին գնահատական տա»,- ասաց Ալավերդյանը և հաստատելով իր խոսքը՝ համոզված նկատեց, որ գերակշիռ ներմուծողը 99% տոկոս չի կազմում:

«Եթե մի տնտեսվարող սուբյեկտ ներմուծում է բենզին կամ շաքարավազ և ներմուծման դիմաց վճարումները կատարում է պետական բյուջե, հայտարարում է ներմուծման քանակի մասին՝ ապօրինությունն այդտեղ ո՞րն է: Եթե տնտեսվարող սուբյեկտը ներմուծում է ապրանք ու առանց օրենքի խախտումների վճարումները կատարում է, այդտեղ ապօրինություն չկա»,- ասաց Ալավերդյանը: