Գեղարքունիքի մարզում սկսվել է անասնակերի կուտակումը

Գեղարքունիքի մարզի տնտեսություններում արդեն մեկ շաբաթ է, ինչ սկսվել են անասնակերի կուտակման աշխատանքները, որոնք առայժմ ընթանում են ցածրադիր գոտիների ցանովի խոտհարքերում:

Ինչպես «Արմենպրես»-ին տեղեկացրին Շորժայի եւ Մեծ Մասրիկի գյուղապետարաններից, անասնակերի համար տարին բերքառատ է համարվում:

«Մենք այս տարի ունենք 250 հեկտար ցանովի եւ 400 հեկտար բնական խոտհարք: Հուլիսի 4-ի դրությամբ մոտ 90 տոկոսով ավարտել ենք հունձը: Ցանովի խոտհարքերի 1 հեկտարից ստացել ենք մինչեւ 4, բնական խոտհարքերից՝ մինչեւ 3 տոննա անասնակեր: Սա մեր համայնքի անասնապահության համար առատ տարի է համարվում, քանի որ վերջին տարիների ընթացքում խոտհարքերում նման բուսածածկույթ չէինք ունեցել»,-նշեց Շորժայի գյուղապետ Սուլիկո Շուշանյանը: Ըստ գյուղապետի՝ այստեղ անասնագլխաքանակը նախորդ տարվա համեմատ որոշակի աճ է գրանցել, եւ հավաքված անասնակերը բավարար կլինի անասնագլխաքանակի ձմեռացման համար:

«Մեծ Մասրիկում 400 հեկտար ցանովի խոտհարքերն արդեն հնձված են մոտ 70 տոկոսով: Հեկտարի միջին բերքատվությունը կազմել է մոտ 3 տոննա: Բնական խոտհարքերում հունձը կսկսվի ավելի ուշ: Անասնակերի համար տարին բերրի է»-հավաստիացրեց Մեծ Մասրիկի գյուղապետ Արմեն Ասատրյանը: Գեղարքունիքի մարզպետարանի աշխատակազմի գյուղատնտեսության եւ բնապահպանության վարչության դիտարկմամբ՝ անասնակերի առատությունը պայմանավորված է նպաստավոր եղանակային պայմաններով: Բարձրադիր գոտիների բնական խոտհարքերում հունձը կսկսվի հուլիսի երկրորդ կեսին:

Խոսրով Խլղաթյան