Լճափ համայնքում անցկացվել է գիշերային լուսավորության ցանց

Գեղարքունիքի մարզի Լճափ գյուղում տեղական բյուջեի միջոցներով կառուցվել է 3300 մետր երկարության գիշերային լուսավորվածության ցանց եւ բնակավայրի անունն ազդարարող կամարաձեւ քանդակազարդ մուտք:

Ինչպես «Արմենպրես»-ին տեղեկացրեց Լճափի գյուղապետ Հայկ Սիմոնյանը, 1260 բնակիչ եւ 270 տնտեսություն ունեցող գյուղը չուներ գիշերային լուսավորվածության ցանց, ուստի առաջնահերթությունն այս տարի տրվել է այս խնդրի կարգավորմանը: Գյուղի գիշերային լուսավոր տեսքը լրացրել է նաեւ նորակառույց մուտքը՝ քանդակազարդ քարի ու երկաթի ներդաշնակությամբ:

Լճափի մուտքն ազդարարող կամարը քարակերտ ու մետաղազարդ է, որը խորհրդանշում է համապատասխանաբար գյուղի եւ կամարի հիմնադրման տարեթվերը՝ 1831-2016 թվականներ: Կամարի քանդակները պատկերում են նուռ ու ցորենի հասկեր, ազգային դեկորներ: Կամարը զարդարված է գիշերային լույսերով:

«Մեր գյուղը եկեղեցի չունի, ուստի բացը լրացնելու համար գյուղի կենտրոնական մասում տեղադրել ենք երկաթակուռ հսկա խաչ, որը գիշերային լուսավորվածությամբ ավելի ցայտուն է երեւում, մինչեւ որ եկեղեցի կառուցելու հնարավորություն կունենանք: Իսկ մինչեւ այս տարվա վերջ գլխավոր անելիքների շարքում են գյուղի գերեզմանոցի ցանկապատումն ու համայնքապետարանի շենքի լուսամուտների նորոգումը, որոնք արդեն մեկնարկի փուլում են»,- հավաստեց համայնքի ղեկավարը:

Խոսրով Խլղաթյան