Գեղարքունիքի մարզում մեկնարկել է 8 մանկապարտեզների և 1 դպրոցի հիմնանորոգումը

Գեղարքունիքի մարզի 6 գյուղական եւ 3 քաղաքային համայնքներում մեկնարկել են 8 մանկապարտեզի եւ 1 դպրոցի շենքերի հիմնանորոգման կամ կառուցման աշխատանքները:

Ինչպես «Արմենպրես»-ին ներկայացրեց Գեղարքունիքի մարզպետ Ռաֆիկ Գրիգորյանը, նախադպրոցական ու դպրոցական հաստատությունների շենքերի նորացման ծրագիրն իրականացվում է ՀՀ Նախագահ Սերժ Սարգսյանի մոտ 2015 թվականի սեպտեմբերի 23-ին կայացած խորհրդակցության հանձնարարականների հիման վրա' «Հայաստանի տարածքային զարգացման հիմնադրամի» կողմից հատկացված 1 միլիարդ 400 միլիոն դրամի շրջանակներում: Մանկապարտեզների շենքեր են հիմնանորոգվում Լիճք, Ծակքար, Գեղամավան,Դդմաշեն գյուղերում, Սեւան, Գավառ եւ Ճամբարակ քաղաքներում: Վարդաձոր գյուղում մանկապարտեզի շենքը կառուցվում է հիմքից:

Նույն հիմնադրամի ֆինանսավորմամբ հիմնանորոգվում է Ծաղկաշենի միջնակարգ դպրոցի շենքը: «ՀՀ Նախագահ Սերժ Սարգսյանի մոտ կայացած խորհրդակցության հանձնարարականների համապատասխան կետով մարզի սոցիալ-տնտեսական հիմնախնդիրների շարքում առաջնահերթությունը տրվում էր նախակրթական եւ կրթական հաստատությունների նորացման ու արդիականացման ծրագրերի իրականացմանը, ինչի հիման վրա էլ ընտրվել են վերոնշյալ համայնքների մանկապարտեզների ու դպրոցի շենքերի նորոգման կամ կառուցման ծրագրերը: Առաջիկայում ներդրումային այլ ծրագրերով կսկսվեն նաեւ մեր մարզում «4-րդ կարգի վթարայնություն ունեցող դպրոցական 5 շենքերի ամրացման աշխատանքները»,-տեղեկացրեց մարզպետը:

Խոսրով Խլղաթյան