«Նոր Զովք» սուպերմարկետում հայտնաբերվել է ժամկետանց և այլ խախտումներով սննդամթերք

ՀՀ գյուղատնտեսության նախարարության սննդամթերքի անվտանգության պետական ծառայությունը դիտարկում է անցկացրել «Նոր Զովք» ՍՊԸ-ին պատկանող իրացման ցանցի 15 սուպերմարկետում, որի արդյունքում հայտնաբերել է մի շարք անհամապատասխանություններ:

Ինչպես տեղեկացրին ՀՀ ԳՆ սննդի անվտանգության պետական ծառայության տեղեկատվության և հասարակայնության հետ կապերի վարչությունից, դիտարկման ընթացքում հայտնաբերվել է ժամկետանց սննդամթերք՝ շերտավոր խմոր («Ան-Դավ» ՍՊԸ), եփած երշիկ սիրողական («Ցարիցինո մսամթերքի կոմբինատ» ՍՊԸ), հում ապխտած երշիկ «Ֆիրմային» («Բարի Սամարացի» ՍՊԸ), եփած երշիկ «Սիրողական» («Նատալի Ֆարմ» ՍՊԸ), պաշինա («Բեկոն Պրոդուկտ» ՍՊԸ), եփած երշիկ «Բժշկական» («Նատալի Ֆարմ» ՍՊԸ), եփած երշիկ «Սիրողական-Կրեմլյովսկայա» («Ցարիցինո» մսամթերքի կոմբինատ» ՍՊԸ), սալ («Բարի Սամարացի» ՍՊԸ), եփած երշիկ «Բժշկական» («Արարատ» Ա/Կ):

Առաջնորդվելով «Սննդամթերքի անվտանգության մասին» ՀՀ օրենքի 7-րդ հոդվածի 1-ին կետի 3-րդ ենթակետի պահանջներով (ժամկետանց սննդամթերքը համարվում է վտանգավոր և ենթակա է օգտահանման կամ ոչնչացման)' վերոնշյալ վտանգավոր սննդամթերքը ՍԱՊԾ տեսուչների կողմից անմիջապես հանվել է վաճառքից և հանձնարարվել է ոչնչացնել:

Իրացման ցանցում առկա է եղել նաև թերի մակնշմամբ սննդամթերք՝ ձու, մրգային կիսել, ֆիլե, հում ապխտած երշիկ, նրբերշիկ, աղիքով նրբերշիկ, մածուն և քամած մածուն, թթվասեր, կաթնաշոռ, սառեցված ձուկ, ձկան պահածո, փաթեթավորված Սկումբրիա ձուկ, պանիր Լոռի, կշռածրարված պանիրներ՝ Լոռի, չանախ, թել պանիր, հորած պանիր, սուլուգունի, հավ, հավի թևիկ, հավի կրծքամիս, կարագ, խմորեղենի տեսականի, քաղցր սուջուխ, կոնֆետների տեսականի, սալորաչիր, հալվա, կաթի փոշի, պաքսիմատ: Հայտնաբերվել է նաև առանց հայերեն մակնշման «Ջերմուկ Գրուպ»-ի արտադրության հանքային ջուր: Տնտեսավարողը մակնշման որոշ թերություններ տեղում շտկել է, իսկ մակնշման խախտմամբ որոշ ապրանքատեսակներ՝ հետ վերադարձրել մատակարարին:

Դիտարկումների շրջանակում իրականացված լաբորատոր փորձաքննության արդյունքում պարզվել է, որ «Ցարիցինո» մսամթերքի կոմբինատ» ՍՊԸ-ի արտադրության «Սիրողական» տեսակի եփած երշիկի նմուշը ՄԱՖԱՄ անթույլատրելի քանակով չի համապատասխանում Մաքսային Միության թիվ 034/2013 տեխնիկական կանոնակարգով սահմանված պահանջներին, «Նոր Զովք» ՍՊԸ-ի արտադրության «Մայրաքաղաքային» տեսակի աղցանի նմուշը ՄԱՖԱՄ, ԱՑԽՄ, պրոտեուս դասի մանրէների, խմորասնկերի, բորբոսասունկերի, իսկ «Վիետնամ» տեսակի աղցանի նմուշը՝ ՄԱՖԱՄ, պրոտեուս դասի մանրէների, խմորասնկերի, բորբոսասունկերի անթույլատրելի քանակությամբ չեն համապատասխանում ՄՄ ՏԿ 021/2011-ի պահանջներին: Վտանգավոր սննդամթերքը ոչնչացնել է: Միաժամանակ, «Նոր Զովք» ՍՊԸ-ի տնօրինության կողմից դադարեցվել է ընկերությանը պատկանող աղցանների արտադրամասի գործունեությունը: