Անասունների բակային մորթն արգելելու համար Հայաստանում կավելացնեն սպանդանոցների թիվը

Անասունների բակային մորթն արգելելու համար համայնքներում պետք է կառուցվեն սպանդանոցներ: Հաջորդ տարի մշակվելու է կանոնակարգ՝ հասարակական կառույցներում, մանկապարտեզներում, հիվանդանոցներում, խանութներում ընդունել միայն այն միսը, որը կունենա սպանդանոցի փաստաթուղթ, ինչը հնարավորություն կտա որակի վերահսկողություն իրականացնել: Այսպիսով' հնարավոր կլինի աստիճանաբար բակային մորթն արգելել:

Այս մասին օգոստոսի 17- ին Գյումրի կատարած այցի ժամանակ նշեց ՀՀ գյուղատնտեսության նախարար Սերգո Կարապետյանը: Այցի շրջանակում նախարարը եղավ Գյումրիում միակ, բայց գրեթե չգործող անասնասպանդանոցում՝ նախկին «Կաթի գործարան»-ի տարածքում: Գյումրու այս անասնասպանդանոցը 2008 թվականից մոտ 3 տարի աշխատանքներ իրականացրել է ՀՀ ՊՆ պատվերով, սակայն այսքանով կառույցի աշխատանքներն ավարտվել են: Ավելի քան 5 տարի է սպանդանոցում մորթ չի կատարվում:

Սանիտարահիգիենիկ պայմաններ՝ մշտական ջուր, լաբորատորիա և անասունին թմրեցնելու հնարավորություն՝ մորթից առաջ, Գյումրու սպ անդանոցն ունի, բայց ինչպես ինքը՝ նախարարը նկատեց, այս սպանդանոցը համարել նորմալ սպանդանոց հնարավոր չէ՝ դրա համար անհրաժեշտ են պայմաններ:

ՀՀ-ում արգելված է անասունների բակային մորթը, սակայն, քանի դեռ համայնքները չունեն սպանդանոցներ, այդ արգելքը չի գործում, գյուղացու համար էլ ավելի նպատակահարմար է սեփական գոմում մորթն իրականացնել: «Պայմաններ են պետք սպանդանոցների գործունեության և դրա հետ միասին բակային մորթն արգելելու համար, բայց դրա համար ժամանակ է պետք՝ մենք չենք կարող անմիջապես արգելել բակային մորթը»,-նշեց ՀՀ գյուղատնտեսության նախարար Սերգո Կարապետյանը՝ հավելելով, որ Գյումրիում եղած սպանդանոցը շահագործման ենթակա չէ՝ դրա շահագործման համար անհրաժեշտ են նոր ներդրումներ և վերազինում:

Արմենուհի Մխոյան