Արծվիկ Մինասյանի համար սկզբունքային է երկնիշ աճ ապահովելը. առաջիկայում կանխատեսումները կհրապարկվեն

ՀՀ էկոնոմիկայի նախարարությունն ուսումնասիրում է տնտեսական աճի նվազում արձանագրված ոլորտները՝ պարզելու, թե ինչի հետևանքով է 2015թ-ի հուլիսի համեմատ ընթացիկ տարվա նույն ժամանակահատվածում ավելի քան չորս տոկոսով տնտեսական ակտիվության նվազում արձանագրվել:

Այս մասին կառավարության նիստից հետո լրագրողների հետ զրույցում նշել է ՀՀ էնոնոմիկայի նախարար Արծվիկ Մինասյանը:

«Պատճառներից մեկը կապված է արձակուրդների հետ: Ընկերություններից հայտնել են, որ իրենք աշխատողներին արձակուրդ են ուղարկել, ունեցել են արտադրական պաշար, արտադրության ծավալ չեն ավելացրել, բայց արտահանման ծավալներն են մեծացրել: Երկրորդ պատճառը եղել է Վերին Լարսի անցակետի փակ լինելը, որը խոչընդոտել է կազմակերպել ավելի մեծ ծավալների իրացում: Մի շարք դեպքերում ընկերությունները, օրինակ խմիչքների արտադրության ոլորտում, միջոցների խնայողություն են արել, որպեսզի կարողանան այս տարի նոր մթերում իրականացնել»,- ասաց նախարարը:

Անդրադառնալով տնտեսական աճի հնարվորությանը, Էկոնոմիկայի նախարարն ընդգծեց, որ առաջիկայում իրենց կանխատեսումը կհրապարակեն և ավելացրեց, որ հակված չէ այսօր միայն աճի վրա հիմնված գնահատականներին արձագանքել: Մինասյանը նշեց, որ իր համար սկզբունքային նշանակություն ունի, թե ինչպիսի հիմնարար փոփոխություններ են կատարվում, որպեսզի միջնաժամկետ ու երկարաժամկետ առումով Հայաստանն ունենա շատ ավելի կայուն երկարաժամկետ երկնիշ տնտեսական աճ: Նախարարի խոսքով' սա ավելի կարևոր է, քան 1-2-3 տոկոսային կետերով աճերը: