Իշխանություններն ի վերջո պետք է ասեն, որ այսպես այլևս շարունակել հնարավոր չէ. Վարուժան Հոկտանյան

Կառավարությանն առընթեր ստեղծված հակակոռուպցիոն հանձնաժողովն արդյունավետ չի կարող լինել։ Այս մասին այսօր լրագրողների հետ հանդիպման ժամանակ ասաց «Թրանսփարենսի ինթերնեյշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը։

Նրա խոսքով՝ պետք է ստեղծել այնպիսի մասնագիտացված կառույց, որը կզբաղվի հենց հակակոռուպցիոն գործունեությամբ։ Հոկտանյանը համոզված է՝ պետք է ստեղծվի անկախ մարմին. «Որպես անկախ մարմնի թեկնածու՝ կարող է լինել ՀՔԾ-ն, որը կկենտրոնանա հենց կոռուպցիոն հանցագործությունների վրա: Այսինքն՝ անկախ մարմինն ինչ-որ խորհրդի տեսքով չպետք է լինի»: Ըստ Հոկտանյանի՝ ամառային ամիսները հակակոռուպցիոն պայքարի ակտիվությամբ առանձնապես աչքի չընկան։ 

Հոկտանյանն անդրադարձավ այսօր Հայաստանում կարևորագույն խնդիրներից մեկին՝ իրական սեփականատերերի հայտնաբերման ինստիտուտի ստեղծմանը։ Հայաստանում պաշտոնյաների կողմից բավական տարածված երևույթ է ընկերությունները գրանցել այլ մարդկանց անուններով, այդպիսով՝ թաքցնելով իրական սեփականատերերին։ 

«Այսօր շատ ընկերություններ ֆորմալ առումով տվյալ պատգամավորին չեն պատկանում, այլ իրենց բարեկամներին: Պետք է հստակ մեխանիզմներ ներդրվեն։ Ճիշտ է՝ ասում են, որ կլինի, սակայն ինքնախաբեությամբ զբաղվել պետք չէ։ Ի դեպ, այս առումով լուրջ ճնշում կա միջազգային կառույցների կողմից»:

Բանախոսը կարծում է՝ սա քաղաքական կամքի խնդիր է, որն այսօր բացակայում է։ «Իշխանություններն ի վերջո պետք է ասեն, որ այսպես այլևս շարունակել հնարավոր չէ ու պետք է արվեն քայլեր, անկախ նրանից՝ դա իրենց շահերին կվնասի, թե ոչ։ Տնտեսական մեր այս վիճակում, եթե չլուծվեն կոռուպցիոն խնդիրները, դա կբերի տնտեսական կոլապսի»,- հավելեց հակակոռուպցիոն կենտրոնի տնօրենը՝ ավելացնելով, որ շատ երկրներ կան, որտեղ տնտեսական այդ վատ վիճակը ստիպել է տեղի իշխանություններին գնալ նման քայլերի։