Նաիրիտցիները վճռական են տրամադրված

«Նաիրիտ» գործարանի նախկին աշխատողները այսօր՝ սեպտեմբերի 29-ին, Կառավարության հերթական նիստին զուգահեռ, կրկին հավաքվել էին գործադիրի շենքի դիմաց։ Նրանց պահանջը նույնն է՝ գործարանի վերագործարկում։ 

ԼՈՒՐԵՐ.com-ի հետ զրույցում նախկին աշխատակիցներից Նարինե Կարապետյանն ասաց՝ կառավարությունը չի ցանկանում լսել իրենց օրինական պահանջը: «Կառավարությունը պետք է վերագործարկի «Նաիրիտը», վերադարձնի նաիրիտցիներին իրենց նախկին աշխատանքը կամ վճարի իրենց աշխատավարձի չափ գումար ամեն ամիս»,- նշեց նա։ 

Պետք է նշել, որ նաիրիտցիներին Կառավարությունից այդպես էլ ոչ ոք չմոտեցավ: Նրանք, ինչպես նախապես հայտարարել էին, ամեն հինգշաբթի հավաքվելու են Կառավարության դիմաց՝ մինչև իրենց պահանջը լսելի դառնա։ 

Ի դեպ՝ Եվրոպայի Հայկական Միությունների Ֆորումը (ԵՀՄՖ) ավելի վաղ հայտարարություն էր տարածել, որ  «EU ASIA Busines Finance Centre» Հոլդինգի ներդրողների պատվիրակությունը ժամանում է Հայաստան, հոկտեմբերի 6-ին նորանշանակ վարչապետ Կարեն Կարապետյանի հետ ներդրումային ծրագրերի քննարկման համար: Նաիրիտցիները Եվրոպայի Հայկական Միությունների Ֆորումի այս նախաձեռնության հետ մեծ հույսեր են կապում։