Հայաստանում մեկնարկեց Հայ-ռուսական միջտարածաշրջանային հինգերորդ համաժողովը

Հայաստանում հոկտեմբերի 14-16-ն անցկացվում է Եվրասիական գործընկերության միջազգային առաջին համաժողովը:

Այս համաժողովի, ինչպես նաեւ համատեղ մեկնարկած Հայ-ռուսական միջտարածաշրջանային հինգերորդ համաժողովի բացմանը ողջույնի խոսքով հանդես եկավ ՀՀ վարչապետ Կարեն Կարապետյանը:

«Ես իսկապես ուրախ եմ արդեն հինգերորդ հայ-ռուսական համաժողովի անցկացման կապակցությամբ: Այս հարթակը միանշանակ օգտակար է, երբ հանդիպում են գործընկերները, նույն մտածելակերպն ունեցող մարդիկ՝ գտնելու օպտիմալ լուծումներ, փոխանակելու իրենց փորձը, ստեղծելու բիզնեսի զարգացման ուղիներ: Չնայած հայ-ռուսական հարաբերությունների բարձր մակարդակին՝ կարծում եմ՝ շատ մեծ ներուժ ունենք այն է՛լ ավելի խորացնելու համար: Միջազգային ինտեգրացիոն գործընթացները, որոնք տեղի են ունենում Եվրասիական տիրույթում, դրան միայն կարող են նպաստել»,- ասաց ՀՀ վարչապետը:

ՀՀ նախագահի աշխատակազմի ղեկավար Արմեն Գեւորգյանն իր ելույթում նշեց, որ համաժողովը նպաստելու է մի շարք ոլորտներում հայ-ռուսական համագործակցության ամրապնդմանը:

«2011 թվականին մեր երկրները Երեւանում նախաձեռնեցին Հայ-ռուսական միջտարածաշրջանային առաջին համաժողովի անցկացումը, որն այս տարիներին ապացուցեց, որ պահանջված է: Այն նպաստեց մեր տարածաշրջանների ներուժի բացահայտմանը, ինչպես նաեւ ամուր հիմքեր դրեց մեր միջտարածաշրջանային համագործակցության համար: Այսօր գոհունակությամբ կարելի է ասել, որ ֆորումը կարեւոր հարթակ է, որը համախմբում է մեր երկրների կառավարական, գործարար, հասարակական ոլորտի ներկայացուցիչներին: Հայ-ռուսական փոխգործակցության օրակարգային մի շարք հարցեր առնչվում են առեւտրատնտեսական կապերի ամրապնդմանը, ներդրումային միջավայրի բարելավմանը, արդյունաբերության, էներգետիկայի եւ այլ ոլոլորտներում համագործակցության ընդլայնմանը»,-նշեց Արմեն Գեւորգյանը:

ՌԴ նախագահ Վլադիմիր Պուտինի խոսքը ներկայացրեց ՌԴ տրանսպորտի նախարար Մաքսիմ Սոկոլովը՝ ընդգծելով, որ հայ-ռուսական հարաբերությունների հիմքերը պատմական են:

«Հայ-ռուսական հարաբերությունների հիմքում ընկած են ավելի պատմական, մշակութային, հոգեւոր արժեքները: Այս հզոր գործոնն ապահովում է մեծ հնարավորություններ մեր երկրների միջեւ տնտեսության, արդյունաբերություն, առեւտրի ոլորտներում արդյունավետ եւ ամուր համագործակցության, հումանիտար եւ գիտական, կրթական կապերի ընդլայնման համար: Ակնկալում եմ, որ այս ընթացքում բաց եւ կառուցողական քննարկումների շրջանակում արված առաջարկությունները կծառայեն հայ-ռուսական երկխոսության կատարելագործմանը, գործնական միջավայրի բարելավմանը եւ ողջ Եվրասիակ ան տիրույթում փոխգործակցության ամրապնդմանը»:

ԵԳՄՀ-ին իրենց մասնակցությունն են ունենալու ԵԱՏՄ անդամ երկրների պետպաշտոնյաներ, խոշոր բիզնեսի, բանկերի, ներդրումային ընկերությունների, հասարակական եւ միջազգային կազմակերպությունների ներկայացուցիչներ, փորձագետներ ԱՄՆ-ից, Չինաստանից, Հարավային Կորեայից, Վրաստանից եւ այլ երկրներից: