Եվրասիական գործընկերության միջազգային համաժողովի շրջանակում ստորագրվեցին մի շարք երկկողմ փաստաթղթեր

ՅՈՒՆԵՍԿՕ բարի կամքի դեսպան Արա Աբրահամյանը կարծում է, որ հոկտոմբերի 13-14-ն Հայաստանում անցկացվող Եվրասիական գործընկերության միջազգային առաջին համաժողովն ամբողջ Եվրասիայում տեղի ունեցող պատմական և դարակազմիկ փոփոխությունների մի մասն է: Այս մասին նա նշեց համաժողովի բացման ժամանակ:

«Եվրասիան սկսում է գիտակցել, որ այն ոչ միայն աշխարհագրական, այլ նաև միասնական տնտեսական տարածաշրջան է, ինչպես հսկայական կենդանի օրգանիզմ, որի յուրաքանչյուր օրգան պետք է առողջ լինի և փոխգործակցի մյուսների հետ: Մեր տնտեսությունների ինտեգրումը շահեկան է Եվրասիայի բոլոր ժողովուրդների համար: Դրանից կշահեն նաև բոլոր գործարարները և ներդրողները, որոնց այսօր ողջունում ենք մեր համաժողովին, և նաև նրանք, ովքեր կմիանան մեզ ապագայում: Մենք ստեղծում ենք այս համաժողովը որպես ընդհանուր տնտեսական սիրտ, որը Եվրասիական տնտեսակա ն ընկերակցության անդամներին և բոլոր երկրներին կապահովի ներդրումներով, գաղափարներով և ծրագրերով»,-ասաց Արա Աբրահամյանը, ում նախաձեռնությամբ է անցկացվում համաժողովը:

Նրա խոսքով՝ համաժողովը ստեղծվել է մասնագիտացումների ինտեգրմանը և փոխգործակցությանն օժանդակելու նպատակով:

«Եթե յուրաքանչյուր երկիր առաջարկի ինտեգրման համար իր լավագույն ռեսուրսները, ունակությունները և հնարավորությունները, ապա ոչինչ չի կարող խոչընդոտել արդյունավետ կառավարվող տարածաշրջանի զարգացմանն ու աճին: Տարածաշրջանի բոլոր երկրները ձեռք կբերեն շատ ավելին՝ ամրապնդելով իրենց համագործակցությունը, քան իրենց անհաշտ դիրքերը: Դա հեշտ գործ չէ, բայց պատմական հակամարտությունների լուծման յուրահատուկ մոտեցումները կօգնեն Հայաստանին և իր հարևաններին վերականգնել վաղուց քանդված կամուրջները»,-նշեց նա:

Արա Աբրահամյանի համոզմամբ՝ միջազգային համաժողովը ծառայում է որպես հարթակ բիզնեսի և քաղաքականության ոլորտում առաջարկությունների, քննարկումների եւ նոր մոտեցումների մշակման համար:

Հոկտեմբերի 14-ին՝ համաժողովի շրջանակում ստորագրվեցին մի շարք փաստաթղթեր, այդ թվում՝ ՌԴ Ռոստովի շրջանի և Հայաստանի Հանրապետության կառավարության միջև առևտրատնտեսական, գիտատեխնիկական և մշակութային համագործակցության մասին։ Փաստաթղթեր ստորագրվեցին նաեւ Կլաստերների և տեխնոլոգիական պարկերի ասոցիացիայի և ՀՀ Նորարարության և արդյունաբերության զարգացման հիմնադրամի միջև՝ համագործակցության վերաբերյալ: