Կառավարությունը նպատակադրել է 2017թ.-ին ապահովել 3,2% տնտեսական աճ. Կարեն Կարապետյան

2017թ-ին Կառավարությունը նպատակադրել է ապահովել 3,2% տնտեսական աճի մակարդակ. ԱԺ-ում 2017թ-ին բյուջեի քննարկմանն այս մասին հայտարարեց ՀՀ վարչապետ Կարեն Կարապետյանը, ով նաև խոստովանեց, որ նշված ցուցանիշին հասնելու համար բավական ջանքեր կպահանջվի:

Վարչապետը վստահեցրեց, որ ամեն ինչ անելու են դրան հասնելու համար: «Վերջին երկու տարիներին ՀՀ տնտեսություն են ներթափանցել ցնցումներ, որը պայմանավորված է ՌԴ տնտեսության անկմամբ և տրանսվերների նվազմամբ: Այդ նպատակով՝ հարկաբյուջետային քաղաքականությունը եղել է հակացիկլիկ, որը բերել է պետպարտքի ավելացման»,- նկատեց նա:

Կարեն Կարապետյանը նշեց նաև, թե իրենց խնդիրն է բոլոր անհրաժեշտ քայլերը կատարել՝ մակրոտնտեսական կայունություն ապահովելու համար և նվազող բյուջեի միջոցով՝ հասնել պարտքի կայունացման: «Թափանցիկ գործելակերպով, մոտեցումները հարկատուների բյուջեի մուտքերը պետք է օգտագործել խնայողաբար, նպատակային, իսկ արդյունքները տեսանելի կլինեն նաև հանրության համար»,-ասաց նա:

Վարչապետը հավաստիացրեց նաև, որ կփորձեն կոշտ քաղաքականությամբ չունենալ դիֆիցիտի ավել աճ, բացի այդ՝ բիզնեսը կթողնեն մաքսիմալ չճնշել, որ կարողանա վերարտադրվել. «Պետք է ստեղծենք նորմալ պլատֆորմ՝ ավելի աշխույժ տնտեսական աճ ապահովվելու համար»,- ասաց վարչապետը: