«Բա դուք ինչի՞ համար եք, ձեզ ինչի՞ համար են աշխատավարձ վճարում». Բագրատյանը բարկանում է

ԱԺ-ում շարունակվում են 2017 թվականի պետական բյուջեի քննարկման աշխատանքները: Քննարկմանը ելույթով հանդես եկավ ՀԱԿ խմբակցության պատգամավոր Հրանտ Բագրատյանն, ով մի քանի դժգոհություններ հայտնեց՝ կառավարության մոտեցումների վերաբերյալ:

«Տասը տարի է՝ կառավարության մոտեցումները չեն փոխվում: Անընդհատ ասում եք` մաֆիոզներին հանենք կառավարությունից, բայց չեք անում: Ամենամեծ պրոբլեմը դուք եք, փոխարչապետն է, ԿԲ ղեկավարն է: Աճ եք խոսք տվել՝ գնացե՛ք, գտե՛ք էդ աճը: 19% ներդրումները իջել են, իհարկե, մենք ձեզ ցույց կտաք այդ փողերի տեղերը: Ներդրումներ ներգրավեք, բա դուք ինչի՞ համար եք, ձեզ ինչի՞ համար են աշխատավարձ վճարում»,- հեգնեց պատգամավորը:

Պատգամավորը շեշտեց նաև, որ Կարեն Կարապետյանի կառավարության ներկայացրած բյուջեն, եթե անգամ կատարվի էլ, միևնույն է, այն նշանակում է հետընթաց՝ պետության համար: «Դուք ուզում եք ասեք՝ մի քայլ է՞լ հետ գնանք, հա՞: Հըլա մի հատ էլ պատկերացրեք՝ գա Տիգրան Սարգսյանը, որն Անիի ավերակ սարքեց, գնաց: Ասում եք՝ կայունություն ենք ուզում, է՝ գերեզմանն էլ ա կայուն, ավելի կայուն բան չկա»,- բարկացավ ՀԱԿ պատգամավորը:

Նա կառավարությանը մեղադրեց նաև թվանկարչության մեջ և շեշտեց, որ ՀՀ-ում չկա 761 հազար կիլոգրամ կատրոֆիլ, 311 հազար տոննա խաղող, որ պետությունն ակնկալի դրանց արտահանում. «Ոլոտներ կան, որ պարզապես թիվը նկարված ա: Վիճվարչության պետն էլ այստեղ չի և թույլ չի տա, որ ստեմ, նա լավ գիտի թվերը: Դուք էս թվերը ճշտո՞ւմ եք, ճշտեք՝ մի հատ հասկանանք՝ ինչ ա կատարվում: Եթե այս բյուջեն կատարվի, իհարկե, Աստված չտա կատարվի, միևնույն է՝ աղետ է լինելու: Ես ուզում եմ զարգացում տեսնեմ»,- եզրափակեց պատգամավորը: