«Ոնց որ դժոխքի մեջ դրախտ լինեք, անապատի մեջ՝ ծաղիկ, որ փթթում, ապրում եք».մեղադրանք՝ ԿԲ նախագահ Ներսես Երիցյանին

2017 թվականի պետական բյուջեի քննարկման ժամանակ ՀԱԿ խմբակցության քարտուղար Արամ Մանուկյանը բարձրաձայնեց Կենտրոնական բանկի ճոխ ծախսերի մասին:

Պատգամավորը հայտարարեց՝ 20 հազար դոլարի ամսագրեր են գնել, նույնքան վճարել են նաև գրականության ձեռքբերման համար՝ հաշվի չառնելով երկրում տիրող 30 տոկոսից ավել աղքատության ցուցանիշը. «Շքեղ եք ապրում: 20 հազար դոլար ամսագրերին եք տալիս, նույնքան՝ գրականության ձեռքբերման համար, 31 ավտոմեքենա ունեք, 820 աշխատող՝ 600 հազար դրամ աշխատավարձով: Ոնց որ դժոխքի մեջ դրախտ լինեք, անապատի մեջ՝ ծաղիկ, որ փթթում, ապրում եք: Գումարած այս ամենին հեռախոսավարձերը, ծառայությունների վարձերը: Ես սոցիալիստ չեմ, բայց դաշտի համեմատ, այս թշվառության ֆոնի վրա չի բռնում, չի կպչում, սրան բացատրություն չկա, չի կարելի այսպես»,- հայտարարեց պատգամավորը:

Արամ Մանուկյանի հայտարարությունները կարծես դուր չեկան ԿԲ փոխնախագահ Ներսես Երիցյանին, ով հայտարարեց, թե մասնագիտական գրականությունը ձեռք են բերում վերլուծական ունակությունները կատարելագործելու համար: «Միայն մասնագիտական գրականությունը, որ կարողանանք վերլուծական ունակությունները կատարելագործենք, որ երեք տարվա համար կանխատեսումներ անենք»,- արդարացավ նա՝ հավելելով, թե դրա արժեքը կազմում է մի քանի հազար դոլար:

«Գրականությունը բավականին թանկ հաճույք է, բայց դրանից չօգտվել՝ նշանակում է դառնալ հետամնաց, հետ մնալ այլ երկրների ԿԲ-ներից: Մեր ծախսերը նրանց համեմատ բավականին զսպված են»,- հավելեց նա: