3.2 տոկոս տնտեսական աճն իրատեսական ու իրագործելի է. նախարար

ՀՀ ֆինանսների նախարար Վարդան Արամյանը վստահ է, որ 3.2 տոկոս տնտեսական աճն իրատեսական ու իրագործելի է: Այս մասին նախարարն ասաց ԱԺ-ում, լրագրողների հետ զրույցում: «Ես հավատում եմ, որ այց ցուցանիշը կարող ենք իրագործել»,- ասաց նա:

Դիտարկմանը, թե 2017թ. բյուջեն բավականին կոշտ է, քանի որ չկա աշխատավարձերի և թոշակների բարձրացում, ինչը կարող է նաև հիասթափություն առաջացնել, Վարդան Արամյանը չհամաձայնեց՝ նշելով, որ ավելի մեծ հիասթափություն կլիներ, եթե ինքը սուտ խոսեր:

«Բացարձակություն չի լինի, միշտ պետք է ինչ-որ մի բանի համար ինչ-որ բան ունենաս, ինչն ամբողջ աշխարհում ընդունված է: Ես զոհաբերել եմ թոշակների և աշխատավարձերի ապագա բարձրացումը, որը ես կարող եմ կարճաժամկետ անել, սակայն իրանց առջև ես արդար ու ազնիվ չէի լինի, որովհետև եկող տարիներին ես կվտանգեմ տնտեսական աճն, իսկ տնտեսական աճն է ինձ հնարավորություն տալիս, որ ես պերմանենտ իրենց աշխատավարձերն ու թոշակները բարձրացնեմ»,- ընդգծեց Վարդան Արամյան:

Նախարարի խոսքով՝ մեկ տարվա խնդիր լուծելով՝ երկարաժամկետ խնդիրը չլուծելն արդարացի չէ: Կարևորն, ըստ նրա՝ կայունություն ապահովելն է։