Արագաչափերի քանակական աճը հանգեցրեց նրան, որ մենք ունեցանք բավականին լուրջ առաջընթաց. փոխոստիկանապետ

Հայաստանի Հանրապետության տարածքում տեղադրված է 179 արագաչափ սարք, որոնցից 91-ը՝ Երևանում, 123-ը՝ խաչմերուկում: ԱԺ-ում բյուջեի քննարկման ժամանակ այս մասին հայտարարեց ՀՀ փոխոստիկանապետ Վարդան Եղիազարյանը: Փոխոստիկանապետի խոսքով՝ այս գործընթացը կրելու է շարունակական բնույթ և հաջորդ տարի Հանրապետությունում կավելանա ևս 12 սարքով:

Հաջորդ՝ կավելացվեն նաև վարորդների սթափության զննության միջոցները՝ ալկոմետրերը: Բացի այդ, ըստ փոխոստիկանապետի՝ 2017 թ-ին նախատեսվում է ներդնել նաև շրջիկ տեսանկարահանող սարքերի ծրագիրը. «Այս ծրագրի պիլոտային փուլն արդեն իրականացվել է»,- հավելեց նա:

Ինչ վերաբերում է «Սեքյուրիթի Դրիմ» ընկերության հետ կնքված պայմանագրերին, ապա Վարդան Եղիազարյանը նշեց, որ դրանք գործում են մինչև 2036թ.-ը: «Արագաչափերի քանակական աճը հանգեցրեց նրան, որ մենք ունեցանք բավականին լուրջ առաջընթաց՝ ճանապարհատրանսպորտային պատահարների թվի առումով»,- ասաց նա:

Պատգամավոր Խաչատուր Քոքոբելյանն էլ իր հերթին հետաքրքրվեց, թե որքա՞ն գումար է մուտք եղել արագաչափերի շնորհիվ, որին ի պատասխան Վարդան Եղիազարյանը պատասխանեց, որ 2015 թ.-ին մուտքագրվել է 8 մլրդ 788 մլն դրամ, որն այս տարի 1 մլրդ-ով պակաս կլինի: