ԱԺ բյուջեն նվազել է՝ հաշվի առնելով սահմանադրական նոր փոփոխությունները

Ազգային ժողովին հատկացվող բյուջեն 54 միլիոն դրամով նվազեցվել է: 2017 թվականի բյուջեի քննարկման ժամանակ այս մասին հայտարարեց ՀՀԿ խմբակցության պատգամավոր Վահրամ Մկրտչյանը՝ նկատելով նաև, որ կառավարության բյուջեի նվազում չի եղել:

«Խնդրում եմ՝ վերականգնեք մեր գումարը՝ 54 միլիոն դրամը»,- ընդգծեց պատգամավորը, որին ի պատասխան՝ ՀՀ ֆինանսների փոխնախարար Ատոմ Ջանջուղազյանն արձագանքեց, որ ցանկացած գերատեսչություն, ցանկացած մարմին ունի ավելի մեծ գումարի կարիք, քան հնարավոր է նախատեսել բյուջեով, իսկ բյուջեն օրենք է, որտեղ հաշվի են առնվում բոլոր ոլորտների հետաքրքրությունները կամ շահերը. «Սա փոխզիջումային փաստաթուղթ է բոլորի կողմից: Իսկ թե ինչու է Կառավարության աշխատակազմում այսպես, ԱԺ-ում՝ այնպես, կավելացնեմ մայն. քանի որ ԱԺ ընտրություններից հետո պատգամավորների թիվը կարող է լինել ոչ 131-ը, դա տրամաբանորեն կարող է հանգեցնել միջոցների օգտագործման ավելի քիչ կարիքի, քան 131 պատգամավորի դեպքում է, իսկ պատգամավորների թիվը կլինի ավել-պակաս, կքննարկվի լրացուցիչ հատկացումների ժամանակ»,- շեշտեց փոխնախարարը:

«Ժառանգություն» խմբակցության պատգամավոր Թևան Պողոսյանն էլ հետաքրքրվեց՝ արդյոք գլխավոր գանձապետը գիտի՞, թե քանի պատգամավոր է ունենալու հաջորդ խորհրդարանը՝ 2017 թ. ընտրություններից հետո:

«Եթե գիտեք կոնկրետ թիվն, ասեք՝ հանրությունն էլ տեղյակ լինի: Մեզ ասվում է, որ նույնիսկ 198 կարող է լինել»,- ասաց նա, որին ի պատասխան՝ Ատոմ Ջանջուղազյանն էլ հայտարարեց, թե Սահմանադրությամբ նախատեսվում է, որ հաջորդ խորհրդարանում ամենաքիչը պետք է լինի 101 պատգամավոր: «Եթե պատգամավորներն ավելի մեծ թիվ կկազմեն, քան 101-ը, կարիք կառաջանա նոր հատկացումների: Այդ հարցը կքննարկվի»,- եզրափակեց պաշտոնյան: