«Պետք է նախ հասկանալ, թե կենսաթոշակն ինչ է...». Հակոբ Հակոբյան

ՀՀ աշխատանքի և սոցիալական հարցերի նախարար Արտեմ Ասատրյանը վստահեցնում է, որ կուտակային կենսաթոշակային համակարգն, անշուշտ, դրական ազդեցություն ունի: Աժ-ում, 2017 թվականի բյուջեի քննարկման ժամանակ, պատասխանելով ՀՅԴ խմբակցության քարտուղար Աղվան Վարդանյանի հարցին՝ այս պահի դրությամբ որքա՞ն գումար է կուտակվել, և որքանո՞վ է այդ ծրագիրն արդյունավետ, նախարարը հավելեց, որ իրենք պատրաստ են ներկայացնել ծրագրի վերաբերյա մանրամասները, եթե դրա անհրաժեշտությունը լինի:

Աղվան Վարդանյանը հայտարարեց, որ պատգամավորներն ուզում են իմանալ, թե ինչ ցուցանիշներ կան այդ ոլորտում, քանի որ արդեն տևական ժամանակ է՝ համակարգը գործում է, սակայն ներդրումների, արդյունքների մասին տեղեկություններ չկան: Նա առաջարկեց ԱԺ սոցիալական հարցերի մշտական հանձնաժողովում քննարկումներ կազմակերպել, և հասկանալ, թե ի՞նչ է կատարվում:

ԱԺ սոցիալական հարցերի մշտական հանձնաժողովի նախագահ Հակոբ Հակոբյանը միջամտեց, նշելով. «Քիչ առաջ մենք խոսում էինք կենսաթոշակների բարձրացման մասին: Նախարարն այստեղ հայտարարեց, որ մենք կենսաթոշակը դիտարկում ենք ոչ թե որպես փոխհատուցում, այլ՝ սոցիալական ծրագիր: Հիմա դուք ասում եք՝ դիտարկենք կենսաթոշակի գաղափարը, որի ամենահստակ սցենարը հետևյալն է. պետք է յուրքանչյուրն իր աշխատածի ու վաստակի չափով հետագայում ստանա իր գումարը»,- հայտարարեց Հակոբ Հակոբյանը, իսկ երբ նկատողություն ստացավ պատգամավոր Աղվան Վարդանյանից, արդարացավ, որ հանձնաժողովի նիստը ինքն է վարում և խոսելու իրավունք ինքը ևս ունի:

«Բերեք հասկանանք մի հատ, մենք ի՞նչ ենք ուզում, հետո նոր կարողանանք մշակել համապատասխան քաղաքականություն»,- հեգնեց հանձնաժողովի նախագահը՝ ընդգծելով, որ պետք է նախ հասկանալ, թե կենսաթոշակն ինչ է...

Հակոբ Հակոբյանի խոսքն անավարտ մնաց, և հարցին շարունակեց պատասխանել նախարար Արտեմ Ասատրյանը, ով իր խոսքում նշեց, որ այս խնդրին առայժմ չի ուզում անդրադառնալ, քանի որ գաղափարն արդեն մանրամասն քննարկվել է. «Մենք կարող ենք տրամադրել ամփոփ տեղեկատվություն, թե այս ընթացքում ինչ ցուցանիշներ ենք արձանագրել: Վերջերս ԿԲ-ը ևս նման տեղեկատվություն տրամադրեց: Վստահ եմ, որ այդ առումով որևէ խնդիր չկա և մենք բոլոր պատգամավորներին կարող ենք տրամադրել տեղեկատվություն նաև ֆոնդերի աշխատանքի, եկամտաբերության աշխատանքի վերաբերյալ: Այս պահի դրությամբ կարող եմ ասել, որ մենք ունենք տաս տոկոսից ավելի եկամտաբերություն, որի միջոցները, բնականաբար, աշխատել են: Դրանք արտացոլված են քաղաքացիների անհատական հաշիվներում: Իսկ, թե որքան՝ յուրաքանչյուր ոք կարող է ինքնուրույն տեսնել: Այդ տեղեկությունների տվյալներով՝ համակարգը դրական ազդեցություն ունի, քանի որ վաթսուն-յոթանասուն տոկոսից ավելի ՀՀ ներդրված միջոցներներն արտացոլված են արտերկրյա արժեթղթերում: Կա նաև դրանց ցանկը, թե հատկապես որ պարտատոմսերում, և որ արժեթղթերում»,- ասաց նախարարը: