Քննարկվում է «սոցիալապես անապահով ընտանիք» եզրույթը վերանայելու հարցը. նախարար

Աշխատանքի և սոցիալական հարցերի նախարարությունը քննարկում է «սոցիալապես անապահով ընտանիքներ» եզրույթը վերանայելու հարցը: Այս մասին Ազգային ժողովում բյուջեի քննարկման ժամանակ հայտարարեց Աշխատանքի և սոցիալական հարցերի նախարար Արտեմ Ասատրյանը: «Մենք քննարկում ենք «սոցիալապես անապահով ընտանիքներ» եզրույթը ևս, որտեղ հաշվառվում են այն ընտանիքները, ովքեր գտնում են, որ իրենք անապահով են:

Մենք կներկայացնենք առաջարկ՝ այդ մեթոդաբանությունը վերանայելու համար: Կան համակարգի հետ կապված բազմաթիվ դժվարություններ ու խնդիրներ, որ ոչ սոցիալապես անապահով ընտանիքներ կան ներգրավված, այս ուղղությամբ կառավարությունը կատարում է քայլեր»,- ասաց նախարարը:

Նրա խոսքով՝ գործող համակարգն անուղղակի գնահատման մեթոդաբանությամբ է աշխատում, քանի որ ուղղակի չի կարող աշխատել, որովհետև չունեն բոլոր քաղաքացիների եկամուտները, իսկ ճիշտ մեթոդաբանությամբ պիտի գնահատվեն եկամուտները ու սոցիալական աշխատողի եզրակացությունը, ով պիտի այցելի տուն, ընտանիք ու եզրակացությունը տա:

Նա նաև հորդորեց բոլոր գործընկերներին, լրագրողներին, որոնք կարող են հստակ տեղեկատվությամբ մատնանցույց անել, որ այսինչ անձը անապահով չէ, դիմեն նախարարություն: Արտեմ Ասատրյանը շեշտեց նաև, որ ընտանեկան դրամագլխի համար փոխանցվել է մոտ 10 միլիարդ դրամ. «6560 ընտանիք այս տարի օգտվել է դրանից. մոտ 19318 անձ: Սահմանամերձ բնակավայրերում ընտանեկան դրամագլխի միջոցներին հնարավորություն է տրվել ձեռք բերել անշարք գույք, որից օգտվել է մոտ 10 ընտանիք՝ ծախսելով մոտ 7 միլիոն դրամ»,- ասաց նա: