Սակագների նվազումն ուղիղ կապ ունի սոցիալական ոլորտի հետ. Արտեմ Ասատրյան

Ազգային ժողովում շարունակվում է սոցիալական ոլորտին 2017 թվականի բյուջեով հատկացված միջոցների քննարկումը:

Պատգամավոր Լյուդմիլա Սարգսյանը հայտարարեց, թե ներկայացված բյուջեն բավականին տխուր նախագիծ է, որտեղ ոչ մի հուսադրղ բան չկա:

«Սոցիալական ոլորտի հատկացումներն ավելացել են, բայց դա այն թիվը չէ, որ կարող եք ծրագրեր իրականացնել»,- ասաց պատգամավորը՝ հավելելով, որ առաջիկայում սպասվում է գազի և հոսանքի սակագների նվազում: «Գազի և էլեկտրաէներգիայի սակագների նվազումը, բնականաբար, սոցիալական վիճակի վրա ազդում է: Մենք հասկանում ենք, որ այդ նվազման հետ կապված արտադրվող ապրանքի գինը նվազում է, բայց մենք գիտենք, որ երբ ինչ-որ ապրանքի գին նախապես ֆիքսվում է, հետո որևէ կերպ չի նվազում: Ի՞նչ եք կարծում՝ սակագների նվազումը կտանի՞ որոշ ապրանքների գնի նվազման»,- հետաքրքրվեց պատգամավորը, որին ի պատասխան նախարար Արտեմ Ասատրյանն արձագանքեց, որ սակագների նվազումն ուղիղ կապ ունի սոցիալական ոլորտի հետ: Նա վստահություն հայտնեց, որ այդ նվազումները արտադրանքի ինքնարժեքի վրա դրական և էական ազդեցություն կունենան և հավելեց, որ այդ էժանացմամբ շահագրգռված են նաև արտադրողները. «Նրանք հնարավորություն կունենան ավելի մեծ արտադրանք իրացնել: Այստեղ, իհարկե, առաջին հերթին առաջարկ-պահանջարկի խնդիր կա, սակայն ես վստահ եմ, որ սակագների նվազումը շատ դրական ազդեցություն է ունենալու մեր երկրի, մեր տնտեսության վրա»,- եզրափակեց նախարարը: