Բոլոր այն ծրագրերը, որոնք շարունակական բնույթ են կրելու, հնարավորինս կթեթևացնեն մեր քաղաքացիների սոցիալական բեռը. նախարար

Անհրաժեշտ միջոցները, որոնք նախատեսվել են 2017 թվականի բյուջեի նախագծում, ամբողջական ներկայացվել են: ԱԺ-ում լրագրողների հետ զրույցում այս մասին ասաց ՀՀ աշխատանքի և սոցիալական հարցերի նախարար Արտեմ Ասատրյանը՝ ևս մեկ անգամ հիշեցնելով, որ այդ ծրագրերը բաշխվել են ըստ ոլորտների: Նախարարը հավելեց նաև, որ պետական բյուջեի երեսուն տոկոսից ավելին ուղղված է սոցիալական պաշտպանությանը, իսկ սա արդեն խոսուն թիվ է:

Լրագրողի հարցին, թե նախորդ տարի կանխատեսել էիք, որ այս տարի ավելի վատ է լինելու, որն ըստ էության եղավ, հաջորդ տարվա համար ի՞նչ կանխատեսումներ ունե՞ք, նախարարը սկզբում չհամաձայնեց, թե ինքը նման բան է ասել, բայց պնդմանը՝ ասել եք, նա հավելեց, որ հաջորդ տարի իրականացվող փոփոխություններն անշուտ տեսանելի կլինեն:

«Հաջորդ տարվա շրջանակներում այն բոլոր միջոցառումներն ու ծրագրերը, որոնք ներկայացված են, կթեթևացնեն սոցիալական ծանր բեռը»,- ասաց նա:

Ա. Ասատրյանը դժվարացավ ասել նաև օրինակ՝ աղքատությունը քանի տոկոսով կնվազի, բայց նկատեց, որ այն ուղղությունները, որոնք կապված են էլէկտրաէներգիայի և գազի սակագների տարբերակված մոտեցման հետ, ըստ էության՝ ուղղված են բացառապես սոցիալական խնդրիների լուծմանը:

«Աղքատության չափը որոշում է ԱՎԾ-ն, որը հիմնվում է տնային տնտեսությունների ամբողջական հետազոտությունների վրա: Առաջիկա շաբաթում ԱՎԾ-ն կներկայացնի 2015 թվականի աղքատության տվյալները, իսկ թե աղքատությունը որքան կնվազի, բնականաբար, այդպիսի գնահատական տալը տեղին չէ»,- ասաց նա՝ շարունակելով, որ բոլոր այն ծրագրերը, որոնք շարունակական բնույթ են կրելու, հնարավորինս կթեթևացնեն մեր քաղաքացիների սոցիալական բեռը:

Հարցին՝ գործազրկության այս ֆոնին, սոցիալական կայությունն ինչպես եք պատրաստվում ապահովել, նախարարը նախ նշեց, որ հաջորդ տարվա բյուջեի առանձնահատկությունները պայմանավորված են նաև այն իրողություններով, այն ինչ արդեն ունենք, ապա շարունակեց, որ գործազրկությունը թեև մեծանում է օպտիմալացման շրջանակներում, բայց դա պետք է դիտարկել զուտ աշխատանքի արդյունավետության տեսանկյունից:

«Երբ պետական բյուջեում իրականացվում է համապատասխան ծախսային քաղաքականություն՝ հաշվի են առնվում բոլոր առաջնահերթությունները: Սոցիալական պաշտպանվածության ոլորտը եղել է, կա ու միշտ կլինի որպես առաջնահերթություն: Այսինքն՝ այն ծախսային ուղղությունները, որոնք առաջնային են, վստահ եղեք, որ առաջին հերթին միջոցները պետք է ուղղվեն հենց այդ ոլորտներին: Ու թեև 2017 թվականի համար եկամտային լրացուցիչ միջոցներ չեն գտնվել, որոնք արտահայտվել են նաև ծախսային քաղաքականության վրա, բայց այն մոտեցումները, որ 2017 թվականին իրականցվող աշխատանքները փոխելու են երկրում իրավիճակը, ես ավելի քան վստահ եմ դրանում:

Իսկ գործազրկության մասով կարող եմ ասել, որ դրանք հիմնականում կապված են օպտիմալացման հետ, ինչն, անշուշտ, ինքնանպատակ չէ: Այն ուղղված է պետական ապարատի արդյունավետությանը և որակի բարձրացմանը ու բխում է անհրաժեշտտությունից: Ես կուզեի, որ այդ հարցին նայեք արդյունավետության զարգացմանն ուղղված տեսանկյունից: Եթե կա ոչ արդյունավետ զբաղվածություն, ապա այս առումով խնդիրը երկկողմանի է՝ և՛ պետության, և՛ ոչ լիարժեք զբաղված անձի համար դրական ազեցություն ունենալ չի կարող: Այստեղ ճիշտ որոշում կայացնելու և ճիշտ լուծում տալու անհրաժեշտություն եմ տեսնում»,- եզրափակեց նա: