Գազի գնի իջեցում՝ իրականում չի լինելու. Արամ Մանուկյան

ԱԺ ՀԱԿ խմբակցության պատգաավոր Արամ Մանուկյանը համոզված է, որ առաջիկայում գազի սակագնի նվազում չի նախատեսվում: «PR, նախընտրական ակցիա է, և գազի գնի իջեցում իրականում չի լինելու»,- ԱԺ-ում, լրագրողների հետ զրուցում հայտարարեց ԱԺ պատգամավորը:

Արամ Մանուկյանի համոզմամբ՝ այդ իջեցումը, որի մասին խոսվում է, լինելու է բյուջեի միջոցների հաշվին:

«Այսինքն՝ բոլորս ավելի շատ ենք բյուջե մուծելու կամ մեր մուծած չափից մի մասը գնալու է այն շերտերին, որոնց համար պետք է տեղի ունենա գազի գների իջեցում: Գազի գների, սակագնի իրական իջեցում՝ սակագինը հաշվող կոմպոնենտների հաշվին, չկա»,-մանրամասնեց նա։

Անդրադառնալով 2017 թ. բյուջեի նախագծին՝ պատգամավորը շեշտեց, որ այս նախագծում ևս տնտեսական աշխուժություն չի նկատվում, որի արդյունքում մուտքերը, եկամուտներն ու ծախսերը ճիշտ են հաշվարկվել:

«Եկամուտները լինում են հարկերից, ներդրումներից, տրանսֆերտներից, ծրագրերի իրականացումից, սակայն ոչ մեկը չկա։ Արտադրություն և ներդրումներ, զարգացում տնտեսական ոլորտում, որը կարող էր կարճ ժամանակում գումար բերել՝ դա էլ չկա: Բնականաբար, այս վիճակում թոշակները ավելացնելու ֆիզիկապես տեղ չկա»,-ասաց նա։